Home » » RTSH: “Takimi Trump- Putin, prodhon armëpushimin në Siri” plus 9 more

RTSH: “Takimi Trump- Putin, prodhon armëpushimin në Siri” plus 9 more

RTSH: “Takimi Trump- Putin, prodhon armëpushimin në Siri” plus 9 more

Takimi Trump- Putin, prodhon armëpushimin në Siri

Posted: 07 Jul 2017 12:35 PM PDT

Samiti i G20 arrin suksesin e parë.  ShBA dhe Rusia kanë arritur marrëveshjen për armëpushimin në Siri. Lajmi u bë me dije nga sekretari amerikan i shtetit Rex Tillerson dhe vjen menjëherë pas takimit të parë mes presidentit amerikan Trump dhe homologut rus, Putin. "Armëpushimi do të hyjnë në fuqi të dielën në mesditë (9 korrik 2017)," – njoftoi AP. Izraeli dhe Jordania raportuan se do ti bashkangjiten marrëveshjes.
Në takimin e parë Trump- Putin, të dy shprehën të kënaqur, Fjalia e Trumpit: "Është nder të jem me ju", mori përgjigje mjaft pozitive nga Putini: "Jam i kënaqur që u njohëm." Biseda e tyre u bazua në rregullimin e marrëdhënieve mes Rusisë dhe Amerikës, të cilat kanë shkaktuar shpesh polemika, shënon BBC.

BERZH shprehet për axhendë të gjerë mbështetjeje në Ballkanin Perëndimor

Posted: 07 Jul 2017 08:03 AM PDT

Edhe pse nuk është deklaruar me pritmëritë e takimeve të tjera, Samiti i Triestes i cili nis pas pak ditësh, ka projektuar të vendose disa struktura të konsideruara të nevojshme për procedimin e ndërlidhjes dhe investimeve mes vendeve në rajonin e Ballkanit. Banka Europiane për Rindërtim e Zhvillim duke bërë të ditur mbështetjen e saj për Samitin e katërt të nismës së Berlinit, eshtë deklaruar e vendosur të shkojë përtej këtij zhvillimi të infrastrukturës fizike me mbështetjen për integrimin në fusha më të gjera të aktivitetit ekonomik.
Fokusi i BERZH këtu do të jetë në promovimin e axhendës së butë të ndërlidhjes – duke ndihmuar në krijimin e lidhjeve midis tregjeve, forcimit të lidhjeve tregtare dhe përmirësimit të klimës së biznesit. “Integrimi i mëtejshëm ekonomik i Ballkanit Perëndimor është thelbësor për zhvillimin ekonomik të rajonit pasi vazhdon të përgatisë lidhje më të ngushta me Bashkimin Evropian”, eshte shprehur Presidenti i BERZH për Politikë dhe Partneritete.
BERZH po punon në të gjithë rajonin për të promovuar reformat dhe po përgatit një Memorandum Mirëkuptimi me Bosnje dhe Herzegovinën mbi bashkëpunimin për të forcuar mjedisin e biznesit pas nënshkrimit të marrëveshjeve të ngjashme për të përmirësuar klimën e investimeve me Shqipërinë dhe Serbinë dhe zhvillimin e sektorit privat në Kosovë.
Gjatë Samitit të Triestes, një nga zyrtarët e lartë të BERZH Pierr Heilbronn do të kërkojë gjithashtu një forcim të platformave për zhvillimin e ndërmarrjeve të vogla dhe të mesme (NVM) për krijimin e vendeve të punës.
BERZH është një nga investitorët më të mëdhenj institucionalë në Ballkanin Perëndimor, me financim kumulativ për rajonin afërsisht 10 miliardë euro dhe me projekte me vlerë afërsisht 1 miliardë euro në vit gjatë viteve të fundit. Në kontekstin e integrimeve rajonale më të mëdha të Ballkanit Perëndimor, BERZH është e përkushtuar të mbështesë Ballkanin Perëndimor të Forumit të Investimeve të Dhomave Rajonale me Dhomat e Tregtisë nga i gjithë rajoni, per te cilin do te kërkohet krijimi i një Sekretariat të Përhershëm të bazuar në Trieste, per të promovuar Ballkanin Perëndimor si një destinacion të përbashkët investimi.
Një fokus fillestar i Sekretariatit të CIF do të jetë krijimi i një Platforme Rajonale të Investimeve, të cilën BERZH po kërkon të nisë zyrtarisht në BERZH-in e ardhshëm të Forumit të Investimeve të Ballkanit Perëndimor në Londër në shkurt të vitit 2018. Platforma e Investimeve do të ofrojë një dritare të vetme për Investitorët e huaj në Ballkanin Perëndimor dhe lehtësojnë dialogun ndërmjet sektorit privat dhe qeverive në identifikimin dhe tejkalimin e pengesave për të bërë biznes në rajon.

Basha: Kavaja, shenjë se PD mund të kthehet forcë e parë

Posted: 07 Jul 2017 06:47 AM PDT

Ish kreu i opozitës së djathtë Lulzim Basha, i cili po kërkon të rikthehet në krye të PD, vazhdon të këmbënguli se gjatë zgjedhjeve të 25 qershorit, kasta në pushtet arriti të triumfonte për shkak të shitblerjes së votës. “Milionat ishin derdhur tashmë. Qindra mijëra votues ishin kapur jo prej një jave, por prej muajsh të tërë. Varfëria e tyre ishte blerë, integriteti i tyre ishte përdhosur. E vetmja forcë politike që nuk u angazhua në shitblerje votash është Partia Demokratike. E vetmja forcë politike që nuk u angazhua në joshje, shantazhe, terror dhe presion ndaj votuesve, është Partia Demokratike” tha zoti Basha gjatë një takimi në Lezhë pjesë e turneut në të gjithë vendin para zgjedhjeve për kreun e PD më 22 korrik.
Zoti Basha ju referua fitores së PD për Bashkinë e Kavajës, si shenjë shprese se PD mund të rikthehet në pushtet. “Kemi mësime të cmuara në këto zgjedhje. Njëri prej tyre është mësimi i Kavajës. E para është bashkimi. Në Kavajë u bashkuan të gjithë faktorët dhe për herë të parë pas tetë vjetësh, Partia Demokratike u rikthye forcë e parë politike në Kavajë, në një qytet ku sundonte banda e Ervin Roshit, një nga më famëkeqet, ku paratë u derdhën lumë nga një nga kapot e korrupsionit që është Arben Ahmetaj, duke paguar shuma marramendëse, deri në 100 mijë euro për 40 vota në Stan të Ri" tha ai.

Tiranë, vazhdon aksioni ndaj abuzimit me ujin e pijshëm

Posted: 07 Jul 2017 06:32 AM PDT

Bashkia e Tiranës dhe Ujësjellësi vijojnë aksionin ndaj abuzimeve me ujin e pijshëm. Në një njoftimin për shtyp të Bashkisë bëhet me dije se grupet e punës kanë bërë verifikimin e  602 rasteve, duke prerë 74 lidhje të paligjshme të ujit të pijshëm, kryesisht në zonat e periferisë së Tiranës. Gjatë verifikimeve në terren, 16 subjekte janë gjobitur sipas parashikimit në ligj, ndërsa për çdo shkelje penale është bërë gjithashtu denoncim në organet e drejtësisë. Po ashtu janë nënshkruar edhe 78 kontrata të reja me konsumatorët. Vijon të jetë në dispozicion edhe numri i gjelbër për të raportuar problemet e furnizimit me ujë dhe për të denoncuar rastet e abuzimit.

Rama: Ndëshkim për këdo që hesht për kultivimin e kanabisit

Posted: 07 Jul 2017 06:24 AM PDT

Kryeministri Edi Rama garanton se Shqipëria do të përmbyllë deri në fund të vitit problematikën me kultivimin e bimëve narkotike. Në një tryezë të posaçme të thirrur në kryeministri, shefi i qeverisë kërkoi nga drejtori i policisë dhe drejtuesit në qarqe, që të ndëshkojnë çdo rast të neglizhencës për kultivuesit e kanabisit. “Në fund të sezonit ne do te mund te themi me plot gojën që ja dolëm ta përmbysnim tërësisht situatën dhe vendosëm ti japim fund historisë së kultivimit të kanabisit. Të jenë të pamëshirshëm ndaj çdo elementi që shfaqet pasiv, e jo më të jetë i përfshirë në mosnjoftimin e menjëhershëm të fenomenit” tha zoti Rama.
Kryeministri Rama, duke vlerësuar edhe bashkepunimin me partnerët ndërkombëtarë për monitorimin, por edhe asgjësimin e parcelave me canabis, tha se rezultatet janë të kënaqshme.”Qeveria e re do të bëjë gjithçka për t'u ofruar në bashkëpunim me qeverinë italiane, siç kemi rënë dhe dakord, alternativa të tjera njerëzve që bien viktimë e rrjeteve të kësaj veprimtarie kriminale, për të nxjerrë bukën e gojës në ato zona rurale ku kanë munguar mundësitë e prodhimit të shëndetshëm dhe punës së ndershme’ tha zoti Rama.
Në nisje të mandatit të dyte, kur tashmë do të drejtojë vetëm, Edi Rama siguroi se do të ketë mundësi të reja që banorët e zonave rurale të mos përfshihen në kultivimin e bimëve narkotike.

Një shkrimtare angleze në gjurmët e “Fijes së Argjendtë”

Posted: 07 Jul 2017 05:09 AM PDT

“Fija e argjendtë”(The Silver Thread”), një rrugëtim në zejtarinë ballkanike, është libri i shkrimtares angleze Elizabeth Gowing i paraqitur në COD. Në mjediset e bibliotekës, mes artistëve e mjeshtrave të fushës, përfaqësuesve të trupit diplomatik, autorja ndau përvojën e saj në kërkim të gjurmëve të filigranistëve shqiptarë dhe ballkanas. “Roberti, bashkëshorti im më dhuroi këtë varëse argjendi dhe kurioziteti se nga vinte më shtyu më tej, të takoja njerëzit që punonin argjendin, njerëzit që e koleksiononin argjendin dhe jam shumë krenare që sot kemi mes nesh Linda Spahiun një prej koleksionisteve e cila ka qenë frymëzim i madh në rrugëtimin tim” thotë zonja Gowing. “Por argjendi ishte edhe një mënyrë për mua të njihja Shqipërinë dhe Kosovën” shton ajo.
Autorja bashkëbisedon me koleksionisten dhe studiuesen Linda Spahiu mbi artin e filigranit, si teknikë e vjetër e përpunimit të argjendit në trojet shqiptare e ballkanike, që nga nxjerrja nga toka, deri te realizimi i veprave me finesë artistike.
Filigrani, si mjeshtëri e vjetër unike, shpaloset në vepër si sintezë e shprehjes së formave bashkëkohore të artit dhe njohjes prej brezave të rinj. Në veprën “The Silver Thread”, shpalosen histori që zënë fill nga minierat, te këngët danteske, ku një fije e argjendtë përshkon historinë e Ballkanit.

Hamburg, nis Samiti i G-20-ës

Posted: 07 Jul 2017 04:53 AM PDT

Në Hamburg nisi të premten punimet samiti dy ditor i 20 shteteve më të zhvilluara të botës. Për kancelaren gjermane, Angela Merkel, mikrpritësen e samitit, takimi përbën një sfidë të madhe. Kj pasi shumica e vendeve pjesëmarrëse kanë qëndrime të kundërta me Shtetet e Bashkuara lidhur me ndryshimet klimatike dhe politikat tregtare, ndërsa me Rusinë lidhur me çështjen e Sirisë dhe ndërhyrjen në Ukrainë.
Megjithatë, zonja Merkel shpreson që samiti i Hamburgut të jetë kurorëzimi i presidencës gjermane të G20-ës dhe do të arrihet të gjendet emëruesi i përbashkët për disa çështje të rëndësishme dhe grupi i të 20-ëve do të arrijë të shtunën të nënshkruajë njëzëri një dokument të përbashkët, siç ka qenë tradita. Ndoshta këtij qëllimi do ti shërbejnë më tepër takimet dypalëshe sesa sesioni i përbashkët.
Tema të nxehta të samitit janë ekonomia dhe tregëtia, marrëveshja për mbrojtjen e klimës, kërcënimi me raketa nga Koreja e Veriut, gjendja në Lindjen e Mesme, terrorizmi ndërkombëtar dhe konflikti në Ukrainë.
Me interes të madh pritet takimi mes presidentit amerikan Tramp dhe atij rus Vladimir Putin, në një kohë kur marrëdhëniet mes dy vendeve janë të tensionuara. Kancelarja gjermane e bëri të qartë me një “Jo” të prerë kur u pyet nëse do të ndërmjetësonte mes Trampit dhe Putinit në rast mosmarrëveshjesh. Ajo tha se do të ndihmojë vetëm në zgjidhjen e problemeve të samitit, të cilat janë jo të pakta.

Mungesa e ujit, shkencëtarët sugjerojnë trajtimin e ujrave të përdorur

Posted: 07 Jul 2017 04:37 AM PDT

Megjithëse uji mbulon mbi 70 përqind të sipërfaqes së planetit tokë, vetëm tre përqind i tij është i pijshëm dhe dy të tretat e kësaj përqindjeje ndodhet në akullnaja, apo i padisponueshëm për përdorim. Si pasojë, 1.1 miliardë njerëz në botë nuk kanë akses të mjaftueshëm në ujë, dhe 2.7 miliardë përballen me mungesë uji të paktën një muaj në vit. Ndryshimet klimatike, rritja e popullatës së ujit, niveli i lartë i përdorimit të ujit në bujqësi, dhe rritja e ndotjes janë katër elementët, të shkaktuara nga faktori njeri, që po ndikojnë në tharjen e rezervave natyrore, çka pritet që në vitin 2025, ta cojë 2/3 e popullsisë së botës të vuajë nga mungesa e ujit.
Të ndodhur para kësaj situate, vëmendja e shkencëtarëve po drejtohet gjithnjë e më shumë në gjetjen e zgjidhjeve, një prej të cilave është edhe trajtimi i atyre që quhen ujëra të përdorura. Përmes impianteve, ujërat që zakonisht hidhen pas përdorimit të tyre, të filtrohen, pastrohen dhe bëhen serish të disponueshme për përdorim. Një raport i publikuar nga UNESCO, duke paraqitur edhe fakte historike që dëshmojnë se praktika e manaxhimit të ujërave të përdorur është aplikuar në mijëvjecarë të ndryshëm, duke filluar nga etruskët, romakët e më tej, sugjeron trajtimin e tyre si zgjidhjen më të mirë për kërkesën gjithnjë e në rritje për ujë. Sipas këtij raporti, trajtimi në nivel të ulët i ujërave të përdorur, sidomos në vendet në zhvillim tregon se ka mundësira të mëdha për sigurimin e furnizimit për ujë për të cilin bota ka nevojë. Shifrat tregojnë që 80 përqind e ujërave të përdorur në botë, dhe 95 përqind e tyre në vendet më pak të zhvilluara, derdhen në mjedis pa u trajtuar. Dhe nëse e gjithë kjo sasi do të bëhej sërish e disponueshme për përdorim, kjo do t’i jepte zgjidhje afatgjatë problemit të shterrimit të burimeve të lëngut pa të cilin nuk mund të ketë jetë.

OSHEE, shkurton investimet për të rritur importet

Posted: 07 Jul 2017 04:28 AM PDT

Operatori i Shpërndarjes së Energjisë Elektrike do të shkurtojë me 13 milionë euro investimet në rrjet, për t’i përdorur për importin e energjisë. Shkak është bërë thatësira e tejzgjatur e cila ka çuar në uljen e prodhimit të energjisë, më i ulti në 10 vitet e fundit. Në një intervistë për RTSH kryetari i Entit Rregullator të Energjisë, Petrit Ahmeti, tha se kostot e importit nuk e cënojnë buxhetin e shtetit. Sips zotit Ahmeti aktualisht çmimet e energjisë në treg janë të larta, ndaj ai vlerëson se mund të ishte importuar edhe më parë. Aktualisht 55 përqind e energjisë që përdoret në Shqipëri importohet.

“Vox Baroque” në Shqipëri

Posted: 07 Jul 2017 03:32 AM PDT

Netët e verës marrin një tjetër magji nën tingujt e muzikës së vjetër baroke. Kjo muzikë e luajtur me instrumente origjinale, mbart emocione dhe esencën e së bukurës. Në Shqipëri për të 4-in vit "Vox Baroque" vjen si një festival ndërkombëtar. Një prej qyteteve ku u shijua kjo muzikë, ishte Korça. Jusuf Beshiri themelues i Festivalit Ndërkombëtar "Vox Baroque", thotë se pjesët e zgjedhura janë përqëndruar më shumë tek muzika napolitane. “Napoli ka qenë një qytet tepër i rëndësishëm në vitet 1600-1700, ku muzika ishte tepër e zhvilluar. Jo më kot kishte katër konservatorë në qytet” spjegon ai. Muzikanti Beshiri thotë se “Këtë vit kemi sjellur dy grupe që do të interpretojnë këtë muzikë instrumentale, vokale, popullore apo qytetare”.
Këtë muzikë të mrekullueshme po e sjellin në këtë festival grupet e njohura si: Collegium Pro Musica, Festa Rustica dhe trio Sonatas & Canzonas.
Pas Shkodrës, Tiranës e Korçës, Berati do të jetë destinacioni tjetër i rrugëtimit të sivjetëm të këtij festivali, jo thjesht një itinerar muzikor, por dhe turistik për të gjithë ata që dëshirojnë të shijojnë tingujt e kësaj muzike që daton në vitet 700, por që mbetet e freskët përherë.