Home » » RTSH: “Orkestra Simfonike e RTSH mbyll stinën koncertore” plus 9 more

RTSH: “Orkestra Simfonike e RTSH mbyll stinën koncertore” plus 9 more

RTSH: “Orkestra Simfonike e RTSH mbyll stinën koncertore” plus 9 more

Orkestra Simfonike e RTSH mbyll stinën koncertore

Posted: 08 Jul 2017 06:17 AM PDT

“In grande bellezza” siç thonë italianët, është përmbyllur stina koncertore e Orkestrës Simfonike të RTSH. Me simfoni nga kompozitorët Bach dhe Bizet, orkestrantët sollën një atmosferë magjike në koncertin që u mbajt në hollin "Gjon Simoni" të RTSH dhe që sjell tingujt e një repertori të përzgjedhur me kujdes nga dirigjenti Oleg Arapi i cili drejtoi këtë koncert.  Në përzgjedhjen e  repertorit të koncertit, evidentoheshin pjesë që nuk janë luajtur në Shqipëri, ose janë luajtur shumë rrallë.
"Të gjitha veprat e Bahut, Moxartit etj janë vepra delikate, të pastra dhe duan përsosmëri në egzekutim dhe te tilla erdhen edhe ne interpretimin final te ketij sezoni nga orkestra simfonike.
Një repertor i gëzueshëm që kulmon me "Carmen" nga Bize si edhe "La danse macabre" nga kompozitori Camilles Saint Saens interpretuar solo nga pianistja e talentuar 15 vjeçare Iva Zurbo e cila zotëron një koleksion çmimesh dhe trofesh muzikore në Shqipëri dhe Gjermani ku shkollohet njëkohësisht. Koncerti i së premtes mbylli një stinë koncertore të ngjeshur me personalitete muzikore dhe vepra të sukseshme për Orkestren Simfonike të Radio Televizionit Shqiptar.

Vazhdon festivali i Pamplonas

Posted: 08 Jul 2017 06:10 AM PDT

Të paktën dy persona u plagosën nga brirët e demave dhe disa të tjerë nga rrëzimet e përplasjet gjatë ditës së dytë të vrapimit me dema nëpër rrugë në Festivalin e San Ferminit në Pamplona të Spanjës. Demat nga ferma Hoze Eskolar vrapojnë për 3 apo 4 minuta për 850 metra deri në arenën ku zhvillohen më pas ndeshjet. Edhe në ditën e parë të vrapimit, të premten, u plagosën 2 amerikanë dhe një spanjoll të cilet po trajtohen në spital me plage jo të rrezikshme për jetën. Kremtimin nëntë-ditor të San Ferminit e popullarizoi Ernest Heminguei, fituesi i çmimit Nobel për letërsi, në romanin e tij “Dhe lind dielli”në vitin 1926. Festa sot tërheq mijëra turistë të huaj, përveç atyre të ardhur nga mbarë Spanja.

122 shtete të botës kërkojnë ndalimin e armatimit bërthamor

Posted: 08 Jul 2017 06:03 AM PDT

122 shtete të botës miratuan marrëveshjen e parë në historinë botërore, me të cilën ndalohet armatimi bërthamor, pavarësisht bojkotit të të gjitha fuqive aktuale bërthamore. Votimi u shpall nga presidentja e konferencës së Kombeve të Bashkuara, Elein Uajt Gomez, e cila ka drejtuar negociatat e gjata për këtë marrëveshje. Shpallja e votimit u pasua me duartrokitje. “Ia dolëm të mbjellim farat e para të botës së lirë nga armatimi berthamor”, tha zonja Gomez. “Bota ka pritur 70 vjet për këtë normë juridike që kur u përdorën për herë të parë këto armë në Hiroshima dhe Nagasaki”, tha ajo. Mirëpo asnjë nga nëntë vendet me armatim berthamor, Shtetet e Bashkuara, Rusia, Britania, Kina, Franca, India, Pakistani, Koreja e Veriut dhe Izraeli, nuk e kanë mbështetur këtë marrrveshje. Në një deklaratë të përbashkët, ambasadorët e Shteteve të Bashkuara, Britanisë dhe Francës në Kombet e Bashkuara, thanë se marrëveshje nuk i merr parasysh realitetet në mjedisin ndërkombëtar të sigurisë.

G 20 : “Formësimi i një botë të ndërlidhur”

Posted: 08 Jul 2017 05:58 AM PDT

Udhëheqësve të 20 vëndeve më të zhvilluara në Hamburg iu bashkuan sot krerët e Bankës Botërore, Fondit Monetar Ndërkombëtar dhe OKB-së në samitin e zgjeruar, temat e diskutimeve te te cilit perputhen me moton e kryesise gjermane: "Formësimi i një botë të ndërlidhur". Qellimi eshte perparimi ne agjenden 2030 per zhvillimin e qendrueshem dhe marreveshjen e Parisit per klimen. Dy nga sesionet e samitit iu kushtuan temave si partneriteti me Afriken, emigracioni, punesimi dhe digjitalizimi. Ne bisedimet politike te se premtes, udheheqësit e 20 shteteve pjesemarrese rane dakord te rritin perpjekjet ne luften kunder terrorizmit, permes bashkepunimit mes tyre. Ky bashkëpunim do të përqendrohet në luftimin e financimit, rekrutimit dhe burimeve ideologjike të terrorizmit. Në deklaratën e përbashkët të publikuar pas takimit, liderët e G 20-ës zotohen se nuk do te lene hapësira të sigurta për financimin e terrorizmit kudo në botë. Nderkaq, takimet dy apo tri paleshe jane shfrytezuar per zgjidhjen e çeshtjeve me interes te perbashket mes shteteve. Shumë aktiv ne samit ka qene presidenti rus Vladimir Putin dhe kryeministrja britanike Tereza Mei, e cila ka kerkuar neper takime te arrihej marreveshje tregtare te favorshme me disa shtete, pasi Britania te dale nga BE-ja.

Franca synon të ndalojë shitjen e makinave me naftë dhe benzinë

Posted: 08 Jul 2017 05:53 AM PDT

Ministri francez i Mjedisit, Nikolas Hylot, deklaroi një synim tepër ambicioz dhe ndoshta të parin në botë për mbrojtjen e mjedisit. “Qëllimi ynë është që deri në vitin 2040 prodhuesit e automjeteve të ndalojnë shitjen e makinave me naftë dhe benzinë”, deklaroi ai. Duke njoftuar planin pesëvjeçar për nxitjen e përdorimit të energjisë së pastër, ministri tha se prodhuesit e makinave franceze kanë projekte që mund ta përmbushin këtë premtim. Njoftimi i tij vjen një ditë pasi prodhuesi suedez i automobilave "Volvo" u bë kompania e parë e madhe e makinave, e cila premtoi se do t'i braktisë makinat me motor me djegie të brendshme. Ministri tha se Franca do të ndalojë në vitin 2022 edhe prodhimin e energjisë nga termocentralet, të cilat aktualisht japin 5 për qind të energjise së përgjithshme.

Qeveria Zaev shkurton shpenzimet dhe rrit pagat

Posted: 08 Jul 2017 05:49 AM PDT

Kryeministri i Republikës së Maqedonisë, Zoran Zaev, deklaroi se qeveria miratoi ribalancin e buxhetit për vitin 2017, duke parashikuar shkurtim të shpenzimeve me 3 miliardë denarë dhe po kaq të investimeve kapitale. Një pjesë e madhe e shkurtimeve prek buxhetin e kryeministrisë për reklama, promovime, fushata qeveritare në vend dhe jashtë. Sipas kryeministrit, paratë e kursyera do të shkojnë për rritjen e rrogave dhe efekti do të jetë i menjehershëm. Nga 1 shtatori, paga minimale në Maqedoni do të jetë 12 mijë denarë apo 200 Euro. Mes masave të lajmëruara është edhe subvencionit për pushime vjetore për të punësuarit me të ardhura të ulëta, një masë që do të nxisë edhe kapacitetet turistike në Maqedoni.

G 20 shoqërohet me përleshje mes protestuesve dhe policisë

Posted: 08 Jul 2017 05:45 AM PDT

Në qytetin gjerman Hamburg vazhduan gjatë gjithë natës dhe sot përleshjet mes protestuesve dhe policisë. Protestuesit kanë ngritur barrikada dhe kanë përdorur gurë dhe sende të forta ndaj forcave të rendit, që janë kunderpergjigjur me topa uji dhe gaz lotsjellës. Mes 100 mijë protestuesve ka pasur mbajt grupe anarkiste, të ekstremit të djathtë dhe të majtë që u kanë vënë zjarrin makinave e dyqaneve. Përplasjet kanë shkaktuar të plagosur nga të dyja krahët. Rreth 200 prej 20 mijë policëve në rrugët e qytetit pësuan dëmtime, ndërsa policia ka arrestuar 19 vetë dhe dhjetëra të tjerë janë paraburgosur. Dhjetëra protestues, po ashtu, janë plagosur. Kancelarja Merkel ka vlerësuar se dhuna është e papranueshme.

“PËRBALLË” – debat për të ardhmen e PD

Posted: 08 Jul 2017 05:31 AM PDT

E ardhmja e PD-se pas zgjedhjeve të 25 qershorit dhe në prag të zgjedhjeve për kryetar partie u diskutua në emisionin “Përballë” të gazetarit Lutfi Dervishi në RTSH. Një nga figurat më të njohura të PD, deputeti demokrat Genc Ruli, i cili u tërhoq nga politika një ditë përpara së PD të shpallte listën e kandidatëve për zgjedhjet e 25 qershorit, e sheh zanafillën e rezultatit të arritur nga demokratët në këto zgjedhje tek marrëveshja mes kreu të PD Basha dhe atij të PS Rama. Zoti Ruli e quaji marrëveshjen e 18 majit “erotiko-poltike”. “Befas një marrëveshje “erotiko-politike” që bërë një natë me kundërshtarin e tij, një marrëveshje që asnjë nga ne nuk e kuptoi” tha zoti Ruli. Sipas tij “I pari që nuk e kuptoi ishte vetë Rama. Nuk dilet befas brenda një nate me marrëveshje radikale që kundrapozicionin gjithë qëndrimin e PD deri atëhere dhe pa dhënë një spjegim” tha zoti Ruli.
Një ndër deputetët e rinj demokratë që hyri në parlamentin e ri, Ervin Salianji, tha në emisionin “Përballë” se në listën e demokratëve munguan emrat që nuk kanë bërë opozitë gjatë 4 viteve të qeverisjes Rama, ndërsa komentoi edhe reagimin e tyre pas publikimit të listës. “Për shkak të hatërmbetjes personale, të dalësh dhe të bësh Lulzim Bashën se qenka djalli, ndërkohë që deri dje ishte zoti dhe ti votoje çdo vendimarrje dhe nuk ke bërë një kritikë…ky është mllef personal që është mirë ti mbajmë brenda partisë” tha ndër të tjera zoti Salianji.
Ndërkohë që PD i afrohet 22 korrikut, ditës kur është përcaktuar zhvillimi i zgjedhjeve për kryetar partie, Edit’h Harxhi, anëtare e Këshillit Kombëtar të kësaj partie, tha se rimëkëmbja e PD-së do të kërkonte më parë nje analizë të rezultatit të zgjedhjeve. Ajo sugjeron “Ndërprerje të menjëhershme të garës, dorëheqja e zotit Basha, mundësia e zgjatjes së garës në një periudhe tjetër pas një analize të thellë të PD e cila mund të zgjasi disa muaj dhe mund të jetë shumë e shëndetshme për PD, futja në një garë të lirë dhe të ndershme me disa kandidatë dhe ajo çka është themelore mbledhja e forumeve të PD”.
I ftuar në panelin e emisionit “Përballë”, analisti Afrim Krasniqi dyshon se zgjedhjet e 22 korrikut për kryetar PD-je do të forcojnë këtë parti. Më tepër shprese duket se ka pas 4 viteve që PD do të qëndrojnë në opozitë. “Nëse mendohet për 22 korrikun PD nuk ka të ardhme dhe do të ketë përçarje. Nëse mendohet për vitin 2021 PD ka të ardhme dhe meriton të ketë të ardhme” tha zoti Krasniqi.
Pas zgjedhjeve te 25 qershorit, ku Partia Demokratike pësoi disfatën më të madhe në jetën e saj, duke marre vetëm 43 deputete, kryetari Basha ngriu funksionet e tij. Më 22 korrik për kreun e partisë më të madhe në opozitë garojnë Lulzim Basha dhe Eduart Selami, një garë që nuk mbyll debatet e hapura në PD për përgjegjësitë e humbjes se 25 qershorit dhe as garën brenda PD-së për drejtimin e saj.

Festivali i Jazzit dhe i Verës në Porto Palermo

Posted: 08 Jul 2017 04:51 AM PDT

Kalaja e Ali Pashë Tepelenës në Porto Palermo të Himarës, për dy netë është kthyer në skenën e Festivalit Ndërkombëtar të Jazzit e Verës. Mbrëmja e së premtes ishte një bashkëbisedim i isopolifonisë, sjellë nga grupi i Lunxhërisë dhe muzikës jazz, interpretuar nga artistë shqiptarë e ata të skenave ndërkombëtare.
Ky festival, i dyti që po mbahet në Shqipëri, është nismë e këngëtares së njohur të këtij zhanri Eda Zari. “Muzika është ajo që na bën të komunikojmë edhe pa fjalë. Sigurisht kjo është një magji të qëndrosh këtu në këtë vend të magjishëm, ku ka kaq shumë legjenda, ku kanë ndodhur kaq shumë histori, ndaj nuk mendoj që të ketë një kartëvizitë më të mirë për Shqipërinë, apo turizmin në botë” thotë artistja Eda Zari Presidente e Festivalit.
Jazzi dhe vera jane besnike të njeri- tjetrit, sjellin të njëjtën poezi në shpirt, ndaj dhe ky festival synon promovimin e të dyja këtyre mediumeve, por dhe vlerave të trashëgimisë kulturore. Mikaela Minga, organizatore e Festivalit të Jazz-it dhe Verës, thotë se synimi ka qenë promovimi i muzikës jazz, por në të njëjtën kohë për të promovuar Shqipërinë si brenda vendit dhe jashtë saj.
Gjatë këtij festivali, do të interpretojne artistë nga Shqipëria e diaspora dhe artistë nderkombëtare që nga ata në rajon Maqedonia, Kroacia, por edhe nga Gjermania, Hollanda, Turqia, e deri nga Zelanda e Re, Bregu i Fildishtë, Kuba, Kolumbia, etj.

Gara për kreun e PD zbret në bazë Bashën dhe Selamin

Posted: 08 Jul 2017 04:23 AM PDT

Gara për kryetarin e ri të Partisë Demokratike ka zbritur në takime me demokratët, dy garuesit Lulzim Basha dhe Eduart Selami.
Zoti Basha është takuar me demokratët e Patosit, Roskovecit, Fierit, Mallakastrës dhe Lushnjes. Ai tha se 25 qershori nuk reflekton vullnetin e qytetarëve, por është një deformim, i prodhuar nga blerja e votës me paratë e drogës dhe korrupsionit, nga presioni ndaj administratës dhe përfshirja e banditëve në zgjedhje. “25 Qershori ishte vdekja klinike e demokracisë. Nuk ishte një proces zgjedhor, por ishte me të vërtetë një proces i manipuluar nga A-ja te ZH-ja. Nisja e fushatës elektorale për formacionin tonë politik, në fakt ishte fundi i fushatës elektorale për kundërshtarët tanë” është shprehur zoti Basha.
Sipas tij “Një javë para se demokratët të ishin në terren në një fushatë qytetare, demokratike, europiane, duke shpalosur platformë, një plan për të nxjerrë vendin nga kriza ekonomike, alternativë për të gjithë kategoritë e njerëzve që vuajnë këtë krizë ekonomike; kundërshtari kishte mbyllur punën. Jo me plan, as me platformë, as me alternativë, por ashtu siç di të mbyllë punë; Me pagesa të majme duke nisur nga votuesit e vet, ata që nuk i ka sistemuar dot me favore e me punë në administratë, duke vazhduar me mbledhjen e kartave të identitetit tek ata që dyshohen si mbështetës të opozitës, me përdorimin në masë të administratës së shtetit dhe favoreve, me përdorimin e parave të derdhura lumë nga trafiku i drogës, me kërcënime jo vetëm të votuesve demokratë, por edhe të familjarëve të tyre, më të gjitha format dhe mënyrat për të tjetërsuar vullnetin e qytetarëve”.
Zoti Basha  premtoi se “Do kërkoj përveç bashkimit, një raport të ri dhe të ndërtuar me kujdes në radhë të parë mes drejtuesve dhe anëtarëve dhe në radhë të dytë dhe më e rëndësishmja midis vetë Partisë Demokratike dhe qytetarëve. Leksioni që vjen nga ato zona që ne kemi fituar, siç është Kavaja, tregon se bashkimi i të gjithë faktorëve, përdorimi i të gjit​hë forcës dhe vendosmërisë për tu përballur me bandat dhe me lekët e pushtetit, pati sukses, vetëm atëhere kur nuk mbeti brenda dhe vetëm brenda familjes tonë por kur u shtri në çdo shtëpi e çdo votues” tha ai.

Fushatën për postin e kryetarit të PD, kandidati Eduard Selami e vijoi në Patos, Mallkastër, Roskovec dhe Lushnje. Duke analizuar shkaqet e humbjes së PD në zgjedhjet e 25 Qershorit, zoti Selami tha se humbja e ka zanafillën më të hershme dhe së fundmi pati shmangie të konsiderueshme nga sistemi i vlerave, meritokracisë, konkurencës dhe rregullave brenda partisë.
"Demokratët janë qytetarë të angazhuar, por ata u shpërfillën dhe nuk u dëgjuan. Ne duhet ti kthejmë njëri-tjetrit besimin, duhet ti kthehemi vlerave të lirisë, e më pas tia rikthejmë ato, të gjithë shqiptarëve", tha zoti Selami. Sipas tij humbja ne 25 Qershor ishte refuzim i shpiptarëve ndaj lidershipit të Bashës.
"Ne duhet ti rikthejmë demokracinë e brendshme PD, funksionimin demokratik, dhe duhet që të prezantojmë brenda forcës sonë politike një frymë të re e cila duhet të insipirojë jo vetëm demokratët por dhe të përcillet për gjithë Shqipërinë. Ne duhet të rrezatojmë shpresë për shqiptarët. PD që në vitin 92 ka qenë forca më promotore e zhvillimit dhe ajo duhet  të kthehet alternativa më e mirë për progresin e shqiptarëve" është shprehur zoti Selami. Kandidati Selami tha se së bashku me demokratët, seksionet dhe anëtarësinë do të punojë me një platformë bashkimi dhe jo përcarje, për të kthyer besimin te PD dhe te vlerat e demokracisë.