Home » » RTSH: “Kryesia e PD: Zgjedhjet më 22 korrik, Basha e Selami kandidatura!” plus 9 more

RTSH: “Kryesia e PD: Zgjedhjet më 22 korrik, Basha e Selami kandidatura!” plus 9 more

RTSH: “Kryesia e PD: Zgjedhjet më 22 korrik, Basha e Selami kandidatura!” plus 9 more

Kryesia e PD: Zgjedhjet më 22 korrik, Basha e Selami kandidatura!

Posted: 03 Jul 2017 12:43 PM PDT

Kryesia e PD ka rrëzuar me shumicë votash kërkesën për të anuluar datën e zgjedhjeve për kreun e ri të demokratëve, ndërsa ka vendosur që këto zgjedhje të mbahen më 22 korrik. Mbledhja e thirrur të hënën pas dite për miratimin e kandidaturave, u bë arenë debatesh të forta mes anëtarëve të kryesisë, njoftojnë burime brenda saj. Vetë zoti Basha ka munguar në mbledhje dhe bashkë me të dhe figura të tjera të rëndësishme saj. Propozimi për të anuluar zgjedhjet u bë nga drejtuesi i Departamentit të Pronave në PD, Gent Malko. “Të anulojmë procedurën e nisur për kryetarin e PD. Procedura është anti-statutore” tha ai. Kërkesa e tij është mbështetur nga një grup kundërshtarësh të zotit Basha, të cilët i kanë kërkuar atij dorëheqjen e parevokueshme.
Mbledhja është drejtuar nga nënkryetari i PD Edi Paloka, i cili ka bërë të ditur se në garë për kreun e partisë kanë paraqitur kërkesën 8 kandidatë, por ai ka propozuar që në garë të jenë kryetari i deritanishëm Basha dhe kandidati i vetshpallur Selami.
Situata duket mjaftë e tensionuar. Mediat kanë nënvizuar ndër të tjera edhe rreshtimin kundër zotit Basha të Jamarbër Malltezi, dhëndërri i ish kryeministrit Berisha. Zoti Malltezi ka shprehur nevojën për zhvillimin e një analize të thellë për zgjedhjet, ndërsa e ka cilësuar qesharak procesin e zhvilluar me urgjencë.

Stadiumi “Niko Dovana” nis rikonstruksionin

Posted: 03 Jul 2017 07:17 AM PDT

Te Teuta po punohet në çdo sektor. Kryesore nuk është vetëm merkato dhe ndërtimi i skuadrës që do të luajë në sezonin e ri futbollistitk por edhe rikonstruksioni i stadiumit "Niko Dovana". Drejtuesit e klubit bregdetar, kërkojnë të krijojnë një ambjent të përshtatshëm, jo vetëm për lojtarët dhe stafin teknik, por edhe për mbështetësit e Teutës. Prej dy ditësh ka nisur puna për t'i dhënë një pamje të re impiantit që ndodhet në qendër të qytetit. Të gjitha tribunat po i nënshtrohen një rikonstruksioni duke filluar nga tribuna përballë, që do të pajiset me stola të rinj, duke bërë që numri i ulëseve të rritet. Gjithashtu po punohet edhe në ambjentet brenda stadiumit, kryesisht në dhomat e zhveshjes, dushet do të vihen të rinj, si dhe në kabinat ku qëndrojnë gazetarët për transmetimet e drejtpërdrejta. Sezoni i ri do ta gjejë Teutën me një sallë konferencash për shtyp, diçka që i ka munguar stadiumit gjatë këtyre viteve. Do të ketë një ndërhyrje edhe në fasadën e stadiumit që do të finalizojë ndryshimin total. Aksioneri Ardian Bardhi së bashku me presidentin Edmond Hasabelliu po hedhin themelet për të ndërtuar një skuadër cilësore me ambicje të mëdha. Sipas drejtuesve te Teuta do të përshtatet programi që ndjek Atalanta si dhe me klubin italian të Serisë A do të ketë binjakëzim. Bardhi garantoi se në skuadër do të punojnë njerëz profesionistë dashamirës të Teutës, me synimin për ta shpallur kampione pas tre sezonesh.

PD: Në Tiranë parqet po i zënë ndërtimet

Posted: 03 Jul 2017 07:11 AM PDT

Pas protestave të banorëve kundër ndërtimit të kompleksit të pallateve në zonën e parkut të autobusëve, kryetari i departamentit të Mjedisit në PD dhe këshilltarët demokratë në këshillin bashkiak të Tiranës thonë se kjo nuk do të jetë e vetmja lulishte që do të zhduket për t’ia lënë vendin ndërtimeve të reja. I pyetur nga gazetarët, Malltezi hedh poshtë pretendimin se leja për këtë pallat është dhënë nga Lulzim Basha në kohën kur ai drejtonte Bashkinë e kryeqytetit. Ndërsa kryebashkiaku Erion Veliaj i konsideron këto deklarata si histeri kolektive. Veliaj e bëri këtë vërejtje gjatë inspektimit për nisjen e ndërtimit të rrugëve të brendshme të parkut të liqenit artificial.

Tiranë; Vijojnë problematikat e furnizimit me ujë

Posted: 03 Jul 2017 07:03 AM PDT

Banorët e kryeqytetit veç temperaturave të larta po përballen këto ditë edhe me oraret e reduktuara të furnizimit me ujë nga rrjeti i ujësellësit. Problematika është më e theksuar në linjat fundore si në Yzberisht apo Shkozë. Në kompleksin e banesave sociale në Shkozë banorët ankohen për mungesën e ujit thuajse gjatë gjithë ditës. Depozitat e këtyre pallateve u furnizuan sot përmes boteve. E njëjta situate është edhe në lagje të tjera të Tiranës. UKT ka vënë në dispozicion 25 bote për të mbuluar nevojat bazë të konsumatorëve. Thatësira e tejzgjatur ka kufizuar burimet ujore, ndërsa lidhjet e paligjshme dhe shpërdorimi i ujit duket se e veshtirësojnë edhe më tej situatën. Gjatë aksionit të ndërmarrë nga taskforca e ukt-së janë prerë 700 lidhje të jashtëligjshme. UKT ka vënë në dispozicion edhe numrin e gjelbër , ku qytetarët mund të raportojnë problemet e furnizimit me ujë të pijshëm, apo të denoncojnë rastet e abuzimit.

Spaho dhe Paloka: Ne garantojmë se do sigurojmë për çdo kandidat një proces të rregullt, të ndershëm dhe të barabartë!

Posted: 03 Jul 2017 06:45 AM PDT

Dy nënkryetarët e Partisë Demokratike Edmond Spaho dhe Edi Paloka, dolën të hënën me një deklaratë të përbashkët ku njoftojnë se ka përfunduar  procesi i paraqitjes së kandidaturave për kreun e PD-së. Në deklaratë nuk jepen emrat e personave që kanë kandiduar. Sot pritet që kryesia e PD-së do të miratojë emrat që përmbushin të  gjitha kriteret, për të garuar në garë. Në deklaratën e tyre ata shpjeguan se përse nuk nuk mund të shtyhen zgjedhjet për kryetarin e PD-së, të parashikuara për në 22 korrik. Sipas tyre zgjedhjet mbahen një herë në katër vite dhe për këtë arsye shtyrja e tyre bie ndesh me statutin. “Ne garantojmë që brenda kompetencave tona do sigurojmë për çdo kandidat një proces të rregullt, të ndershëm dhe të barabartë sipas statutit të PDSH” nëvizojnë deklaratë nënkryetarët e PDSH , Spaho dhe Paloka. Kërkesa për shtyrje të zgjedhjeve në shtator ishte bërë nga Eduard Selami i cili ishte i pari që deklaroi kandidaturën e tij.

Zgjedhjet në PD, përgatitje nën tension

Posted: 03 Jul 2017 06:01 AM PDT

Pas vendimit për të ngrirë kompetencat e tij ekzekutive si kryetar i Partisë Demokratike, Lulzim Basha ka dalë vetëm sot nga zyra e tij, për të nisur edhe pse jozyrtarisht fushatën për garën e kreut të partisë më të madhe opozitare në vend. Ai u takua me anëtare të PD-së në barin pranë selisë blu, ndërkohë për mediat shmangu çdo koment mbi kërkesat në përsëritje për dorëheqjen e tij.
Por ashtu si zoti Basha, edhe i vetmi rival i tij në garë, Eduart Selami ka nisur të shfaqet në selinë e PD më shpesh. Ai ka kërkuar mbështetje nga anëtarët dhe simpatizantët e PD-së. Sot zoti Selami takoi Bashën në zyrë, ku i ka kërkuar që zgjedhjet për postin e kryetarit të shtyhen nga data 22 korrik në fillim të shtatorit.
Ndërkohë ish nënkryetari i PD dhe ish kreu i grupit të saj parlamentar Astrit Patozi, që kushtëzoi kandidimin e tij me dorëheqjen e Bashës për ti dhënë sipas tij garanci garës, preferon të shpreh qendrimet e tij në rrjete sociale. Sipas zoti Patozi, Lulzim Basha mbetet përgjegjës i vetëm jo vetëm për rezultatin katastrofik të PD-së në zgjedhje, por edhe për bllokimin e një garë që do ti jepte asaj shansin e vertetëte të ringritjes.
Qëndrimin e tij zoti Patozi, e bëri publik, pas negocimit që sekretari i përgjithshëm i PD Ristani morri përsipër të zhvillonte me zotin Basha për kërkesat e parashtruara nga ish nën kryetari i PD-së.
Zoti Ristani, dy nën kryetarët e partisë Spaho e Paloka, si dhe sekretari organizativ Bozdo, janë mledhur paraditen e së hënës, të ngarkuar me organizimin e procesit zgjedhore. Pasdite pritet të mblidhet kryesia e PD. Mes tyre ka firmëtarë për dorëheqjen e zotit Basha, si zonja Bregu, zoti Ruli, zoti Malltezi, zonja Guxholli, zotërinjtë Bushati, Alizoti etj. Kjo mbledhje do të jetë edhe përballja e parë e Bashës me ta pas vendimit të tij për tu vetëngrirë, pas humbjes në zgjedhjet e përgjithshme të 25 qershorit.

Patozi: Basha po e çon me bindje PD drejt shkatërrimit përfundimtar

Posted: 03 Jul 2017 05:39 AM PDT

Ish nënkryetari i PD dhe kreu ish kreu i grupit të saj parlamentar Astrit Patozi ka akuzuar të hënën kryetarin e PD, Lulzim Basha, se ka marrë të gjitha përgjegjësitë për prishjen e një gare të drejtë, duke refuzuar pothuajse të gjitha kërkesat për zhvillimin e një procesi të paanshëm, gjithëpërfshirës dhe të pandikuar. Zoti Patozi i cili fundjavën e kaluar shprehu dëshirën për të kandiduar në postin e kreut të PD, por në kushte të barabarta, në një status në Fejsbuk shkroi se i ka kërkuar kandidatit Lulzim Basha të çlironte PD nga marrja peng e procesit të reflektimit dhe të garës së drejtë brenda PD. “Nuk lëvizi as gishtin për të reaguar, por duket se është shumë i vendosur t’i shkojë deri në fund kèsaj maskarade zgjedhore, e cila nisi me shkelje të rënda të librit të rregullave të PD” shkruan zoti Patozi.
“Eshtë fare e qartë për të gjithë, Lulzim Basha ka marrë përsipër nisjen dhe përfundimin e një farse të shëmtuar elektorale, që thellon akoma më shumë përçarjen dhe krizën e thellë të PD. Pas kësaj, demokratëve u lind e drejta e çdo lloj forme reagimi për të mos lejuar rrëmbimin pa garë të mandatit të kryetarit të Partisë Demokratike, Lulzim Basha, personi që e çoi atë në humbjen më të rëndë të historisë së saj dhe po e çon me bindje drejt shkatërrimit përfundimtar" shkruan ish nënkryetari i PD dhe kreu ish kreu i grupit të saj parlamentar Astrit Patozi.

Rikthehet “Kamioni i lirisë”

Posted: 03 Jul 2017 05:06 AM PDT

Muri i ambasadës gjermane në Tiranë, mund të pagëzohet pa droje si “Muri i vrasjes së frikës”. Një frikë që mbizotëroi për mëse gjysëm shekulli dhe që u kthye në simbol të lirisë falë një burri kurajoz si Ylli Bodinaku. Falë kurajos çmendurake të tij, më 2 korrik 1990, kamioni që drejtonte, do të shëmbte murin e pasëm të ambasadës gjermane, duke e kthyer në porten e lirisë për 5200 shqiptarë që hynë në ambasada në Tiranë 27 vite më parë. Sot në atë vend qëndron një instalacion gjysëm “Skode” pikërisht në memorie të asaj dite që shënoi edhe grushtin e parë të fortë ndaj regjimit komunist të Tiranës. “Ishin 38 vetë që vranë frikën, jo vetëm unë” thotë Bodinaku. “Unë vrava tmerrin, që do të çaja murin! Ja ku është muri, timoni…Zoti desh që ne të jetonim dhe jetuam. Dhe jam shumë i lumtur që e theva atë regjim” tha Bodinaku.
Eljan Tanini qe ka realizuar konceptin e instalacionit se bashku me protagonistin e asaj ngjarje, kanë vendosur ti japin një emër dhe një fytyrë kësaj qoshje të fshehur të Tiranës që u khye në simbol të vrasjes së frikës dhe rrugëdaljes në perëndim për mijëra shqiptarë. “Ideja ishte shumë e vështirë për të nisur diçka të bukur dhe për ti dhënë Tiranës një ide urbane, ku të gjithë qytetarët, shqiptarë dhe të huaj, të vizitojnë një histori që ka ndryshuar regjimin komunist duke na sjellë në demokraci” tha Eljan Tanini.
Instalacioni ka tërhequr vëmendjen dhe kujdesin e kryetarit të bashkisë së kryeqytetit Erion Veliaj dhe ambasadores gjermane. “Mirënjohja më e madhe i shkon Ylli Bodinakut, ndoshta një nga zërat më të guximshëm dhe një nga personalitetet më të guximshëm të Tiranës së asaj kohe” tha kreu i bashkisë Veliaj. “Heroi ishte një njeri i thjeshtë i cili merrte fuqi nga dëshira për të ndërruar një sistem dhe një regjim” shtoi ai.
"Kamioni i lirisë" drejtuar nga Ylli Bodinaku me 39 vetë të tjerë në të, hapën murin dhe çelën rrugën drejt lirisë për mijëra shqiptarë që refuzonin në heshtje regjimin komunist. Ndonëse muri është mbyllur dhe restauruar, e pandryshueshme mbetet dëshira e shqiptarëve për tu larguar sërish.

Futboll: Maqedoni – Shqipëri, në Strumicë “për arsye sigurie”

Posted: 03 Jul 2017 04:13 AM PDT

Në një spot promocional për turizmin në Maqedoni, ndër të tjera, bëhet e ditur se Shkupi është vetëm 297 km nga Porti i Durrësit, porti më i madh në Shqipëri. Por kjo duket se është vetëm për të joshur turistët e huaj. Të bën përshtypje ky fakt, kur mëson se ndeshja e shtatorit midis Maqedonisë dhe fqinjit të saj Shqipërisë, të dyja pjestare të Grupit G në takimet për Botërorin “Rusia 2018”, është vendosur të luhet në Stadiumin "Mladost" të Strumicës. Çdokush mendonte se ai do të luhej  në Shkup,  në impiantin modern “Filipi i 2-të”.
Shtrumica është një qytet i vogël në juglindje të Maqedonisë, në afërsi të kufirit me Greqinë dhe Bullgarinë, me afro 100 mijë banorë. Stadiumi i Strumicës, është ndërtuar në mesin e shekullit të kaluar dhe ka një kapacitet prej rreth 6500 personash. Shumica e banorëve të këtij qyteti, 92 përqind janë me origjinë maqedonase, 6.8 përqind turq, dhe pjesa e mbetur, pak më shumë se 1 përqind u përkasin kombësive të tjera.
Takimi Maqedoni – Shqipëri mund të rezultojë përcaktues për Shqipërinë në vendin e 3-të në një grup me 4 herë kampionen e botës, Italinë, dhe një herë kampionen e botës, Spanjën.  Ndaj për këtë arsye vendimi i autoriteteve maqedonase që Maqedoni- Shqipëri të luhet në Strumicë, ka shtangur edhe vetë Federatën Shqiptare të Futbollit. Në një sqarim zyrtar bëhet e ditur se "Nisur edhe nga rethanat e një ndeshje delikate, UEFA ngriti një grup inspektimi të sajin për të parë edhe stadiumin e Strumicas, një impiant që nuk përputhet aspak për standartet ndërkombëtare të zhvillimit të ndeshjes eliminatore zyrtare", – shkruhet ndër të tjera në sqarimin e organizmit që qeveris futbollin shqiptar. Sipas FSHF "Në konfirmin e tyre të mëvonshëm, si dhe pas inspektimit të grupit të punës, UEFA vendosi që për arsye sigurie ndeshja zyrtare eliminatore e shtatorit MAQEDONI-SHQIPËRI të luhet në stadiumin e Strumicas, dhe jo në Shkup, pasi në argumentin e tyre, ata kishin më shumë primare garancinë e sigurisë për tifozët, gjë për të cilën ishin më shumë të sigurtë në Shtrumicë, se sa në Shkup, në stadiumin “Filipi i 2-të”. Dhe për këtë ajo ka marrë garancitë përkatëse."
FSHF ndërkaq i është drejtuar vetëm para pak ditësh Sekretarit të Përgjithshëm të UEFA-s, më pas edhe Drejtorisë për Sigurinë e Stadiumeve në UEFA.
Komentet në Tiranë e vlerësojnë si të qëllimishëm caktimin e Stadiumit të Strumicës për takimin Maqedoni-Shqipëri. Shumëkush ka shtruar pyetjen se si stadiumi modern “Filipi i 2-të” në Shkup, një stadium me standarte evropiane, me rreth 34.000 vende, nuk i përmbush dot kërkesat e organizmit që qeveris futbollin kontinental, për sigurinë e tifozëve, ndërsa stadiumi lokal i Strumicës po. Komentatorët kanë shënuar edhe faktin se Shqipëria do të ketë të drejtën e vetëm 325 biletave, nga 6500 vende që ka stadiumi.
Natyrisht, caktimi i stadiumit është e drejtë ekskluzive e vendit mikpritës dhe nuk është sekret që zgjidhet një stadium sa më pak i volitshëm për kundërshtarin. Por zgjedhja e një stadiumi të tillë për një ndeshje ndaj Shqipërisë, të sjell ndërmend incidentet e 2011-tës apo edhe më herët në Prilep, ku nuk munguan koret raciste anti-shqiptare.

Thaçi dhe Vuçiç; Takim në Bruksel

Posted: 03 Jul 2017 03:32 AM PDT

Shefja e politikës së jashtme të Bashkimit Evropian, Federika Mogerini, takoi sot në Bruksel presidentin e Kosovës, Hashim Thaçi, dhe atë të Serbisë, Aleksandar Vuçiç. Në takimin trepalësh në Bruksel, Vuçic dhe Thaçi shkëmbyen pikëpamjet e tyre më lehtësuesen evropiane të dialogut lidhur me vazhdimin e bisedimeve për normalizimin e marrëdhënieve si dhe për zhvillimet në rajonin e Ballkanit Perëndimor. Në takim u fol edhe për mënyrën se si do të vazhdojë dialogu në fazën e re dhe objektivat që synohen të arrihen në kuadër të procesit të normalizimit. Mendohet që dialogu të vijojë në nivel presidentësh, krahas grupeve teknike që takohen rregullisht. Dy vendet e arritën marrëveshjen e parë për normalizimin e marrëdhënieve në Prill të vitit 2013 ndërsa takimin e fundit në nivel të lartë Prishtina dhe Beogradi e zhvilluan në 1 Shkurt të këtij viti. Normalizimi i marrëdhënieve është kusht edhe për Kosovën, edhe për Serbinë që të përparojnë në rrugën e integrimit evropian. Kosova tashmë ka nënshkruar Marrëveshjen e Stabilizim Asocimit me BE-në, ndërsa Serbia ka hapur kapituj të negociatave të anëtarësimit.