Home » » RTSH: “Ditmir Bicaj; Mbrojtësi shtatlartë sezonin e ardhshem do të luajë me Flamurtarin” plus 9 more

RTSH: “Ditmir Bicaj; Mbrojtësi shtatlartë sezonin e ardhshem do të luajë me Flamurtarin” plus 9 more

RTSH: “Ditmir Bicaj; Mbrojtësi shtatlartë sezonin e ardhshem do të luajë me Flamurtarin” plus 9 more

Ditmir Bicaj; Mbrojtësi shtatlartë sezonin e ardhshem do të luajë me Flamurtarin

Posted: 06 Jun 2017 06:25 AM PDT

Ditmar Bicaj është lojtari i parë që për sezonin e ri futbollistik 2017-2018 do të luajë me Flamurtarin. Lojtari lezhjan që sezonin e kaluar ka luajtur për ngjyrat e Vllaznisë, ka nënshkruar zyrtarisht për vlonjatët. Të martën ai ka bërë edhe prezantimin me fanellën e Flamurtarit. Bicaj, edhe dy sezone më parë, në merkaton e dimrit ishte pranë Flamurtarit, por më pas zgjodhi të luante jashtë kufijve të vendit. Ai u aktivizua fillimisht në kampionatin iranian për të vijuar më pas me Partizanin. Tashmë qendërmbrojtësi bëhet pjesë e Flamurtarit për sezonin e ardhshëm, duke u bërë kështu afrimi i parë tek kuqezinjtë e trajnerit Shpëtim Duro në merkaton e verës. Ditmar Bicaj mbylli kampionatin me Vllazninë, e pas ndeshjes së fundit me të konfirmoi largimin nga Shkodra. Vetëm pak ditë më parë mbrojtësi pati një takim me trajnerin Duro dhe menjëherë u fol për një kalim të tij drejt Vlorës. Tashmë ka ardhur dhe zyrtarizimi, ndërsa për Flamurtarin ky është një përforcim i mirë në mbrojtje kur dihet eksperienca e Bicajt. Shtatlarti lezhjan në kampionatin shqiptar ka luajtur edhe me Skënderbeun, Partizanin, Dinamon e Tiranën. Ndërsa ka provuar të aktivizohet edhe në kampionatin e futbollit në Iran dhe Bullgari. Trajneri Duro këmbëngul të përfocojë skuadrën e Flamurtait me disa emra të njohur si: Asion Daja, Mentor Mazrekj dhe Mersini. Ky i fundit, i cili luajti sezonin e kaluar me Luftëtarin, duket se se është shumë pranë marrëveshjes me vlonjatët dhe nëse arrihet kjo, bie pista Cuculi.

Maqedoni; Qeveria e re në ditën e dytë

Posted: 06 Jun 2017 06:15 AM PDT

Qeveria e re e Maqedonisë, me kryeministër Zoran Zaevin, ka sot ditën e saj të dytë të punës. Në mbledhjen e parë kabineti miratoi një deklaratë të përbashkët për punë efikase të anëtrave në interes të shtetit. Mbledhja formalizoi edhe 5 zëvëndëskryeminstrat, mes të cilëve 2 shqiptarë. Bujar Osmani do të jetë zëvendëskryeministër përgjegjës për integrimet evropiane ndërsa Hazbi Lika zvendëskryeministër përgjegjës për zbatimin e marrëveshjes së Ohrit. Partitë shqiptare morën edhe 3 ministra të cilët janë Edmond Ademi për diasporën, Andan Qaili dhe Ramiz Merko, për investimet e huaja. Si për të dëshmuar vendosmërinë se vendi duhet të hedhë hapa konkrete në rrugën e integrimit, të bllokuar prej kohësh, kabineti lajmëroi se Ministri i Jashtëm Nikolai Dimitrov do të udhetojë së shpejti në Athinë me qëllim ngritjen e urave të miqësisë dhe hapjen e dyerve të integrimit. Qeveria e re e pranon se sfida më e madhe për integrimin euro atlantik të Maqedonisë qëndron të marrëdhëniet me Greqinë.

Raporti Europian i Drogave 2017: Shqipëria problem për kultivimin e kanabisit

Posted: 06 Jun 2017 06:14 AM PDT

Kultivimi dhe shitja e lëndës narkotike kanabis sativa, por edhe e vajit të tij në Shqipëri, përmenden për herë të parë si shqetësim në raportin vjetor Europian të Drogave të vitit 2017, publikuar nga Qendra Europiane e Monitorimit të drogave dhe Varësisë nga Droga, me seli në Lisbonë.
Në këtë raport shkruhet se duke u bazuar në të dhënat e fundit tregohen ndryshime në rrugën e trafikut të narkotikëve, me rritje të trafikut si të barit të kanabis ashtu dhe vajit të kanabisit nga Ballkani Perëndimor, veçanërisht Shqipëria, e lidhur me rritjen e kultivimit të kanabisit në këto vende. Gjithashtu Shqipëria përmendet edhe si vend kryesor furnizues për shtetet fqinj për këtë bimë narkotike.
Greqia, ku prodhohet gjithashtu kanabisi, është një pikë e rëndësishme hyrëse në BE për kanabisin shqiptar, që shpërndahet në disa shtete anëtare, përfshirë Italinë, Kroacinë, Hungarinë, Republikën Çeke dhe Austrinë. Një pjesë e kanabisit shqiptar mund të shitet dhe në Europën perëndimore, si në Gjermani, ose Francë. Gjithashtu Shqipëria permendet së bashku me Hollandën, si nyje kryesore e shpërndarjes për vajin afgan të kanabisit. Raporti thekson se grupet shqiptare të krimit të organizuar vlerësohet se janë të përfshirë në tregtimin e vajit Afganistan të kanabisit, kryesisht në Europën Qendroe dhe Lindore përmes Holandës dhe Mbretërisë së Bashkuar.

Rama në Tropojë: Vota për PS ju garanton dinjitetin!

Posted: 06 Jun 2017 06:02 AM PDT

Edhe në Tropojë, Kryeministri Edi Rama iu kërkoi sot banorëve të Tropojës të votojnë më 25 qershor ofertën elektorale të Partisë Socialiste pasi sipas tij Partia Demokratike për një cerek shekulli nuk bëri asgjë për Tropojën. “Po të matemi për punët për Tropojën, unë me Saliun jemi si Reali me Kukësin” tha zoti Rama mes ironisë dhe humorit. “Edhe po nuk i votuat Lulin dhe Saliun kësaj radhe nuk ndodh gjë. Punën jua bëjmë ne, ju duhet të zgjidhni kalin më të fortë dhe karrocën më të mirë e jo të shkoni pas mushkave” shtoi më tej ai.
Kreu socialist dhe kreu i qeverisë premtoi mbështetjen e qeverisë edhe për 4 vitet e ardhshme.”Votoni për të na dhënë një fuqi më të mëdha që autoriteti dhe dinjiteti juaj të garantohet njëherë e përgjithmonë” tha zoti Rama.
Sërish ai është ndalur tek reforma në drejtësi duke e cilësuar si mekanizmin që do të spastrojë sistemin nga të korruptuarit. “Gjykatësit që ua kanë nxirë jetën qytetarëve do të shkojnë në burg. Nuk ka kthim prapa” tha keu i qeverisë. Por veç premtimeve dhe sygjerimeve, kryeministri iu dha këshillë tropojanëve, të mos ja japin votën partive të vogla pasi sipas tij këto janë vota të shkuara dëm.

Blushi: LIBRA, vota morale e Shqipërisë!

Posted: 06 Jun 2017 05:39 AM PDT

Kryetari i LIBRA-s, Ben Blushi, vijon fushatën e tij derë më derë. I shoqëruar nga anëtarë të kësaj forcë politike, zoti Blushi është takuar me qytetarë votues të njësisë 9 në kryeqytet të cilëve u ka shpjeguar programin elektoral të forcës politike që ai drejton duke u kërkuar votën më 25 Qershor. “Duhet të votosh se është detyrim këtë rradhë” u është drejtuar zoti Blushi zgjedhësve me të cilët takohej. “Nuk e rregullojmë dot këtë vend pa votuar të gjithë” përsëriste vazhdimisht ai.
Blushi tha se këto takime synojnë të bindin qytetarët se LIBRA është e vetmja mundësi në këto zgjedhje. “Kemi dalë si çdo ditë dhe kemi ecur disa kilometra, për të bindur njerëzit kudo qofshin ata, se LIBRA është e vetmja mundësi në këto zgjedhje” u shpreh zoti Blushi për RTSH.
Kreu i LIBRA-s denoncoi atë që e cilësoi si censurë të medias ndaj kësaj force politike, duke i akuzuar ato se janë të blera nga partitë e vjetra. “Televizionet e shitura të Shqipërisë e kanë shitur LIBRA-n, e kanë bllokuar, e kanë bërë embargo. Sipas të dhënave zyrtare, partitë e vjetra kanë krijuar monopol në televizionet e shitura të Shqipërisë” tha kreu i LIBRA-s. “Që kur ka filluar fushata, që ditën e parë, Rilindja ka dalë 53 orë në TV, Çadra 39 orë, partia e presidentit 13 orë. Imagjinoi sikur të shikosh televizor dy ditë rresht Edi Ramën apo Lulzim Bashën, apo Sali Berishën non stop në televizor” tha plot ironi zoti Blushi, ndërsa kujtoi se LIBRA ka qenë e pranishme 27 minuta. “Sigurisht do ti mundim duke ecur dhe shkuar derë më derë për të bindur shqiptarët se kjo është një arsye më shumë për të rrëzuar këtë kastë të korruptuar televizionesh private, mediash të korruptuara dhe partish të vjetra që kanë bllokuar Shqipërinë. Më 25 qershor LIBRA është e vetmja mundësi zgjedhjeje. Është vota morale e Shqipërisë” këmbënguli Ben Blushi kreu i LIBRA-s.

Kristoforidhi, lëvruesi i shqipes në gegnisht dhe toskërisht

Posted: 06 Jun 2017 05:04 AM PDT

Kurdoherë që vihemi para pikepyetjes mbi eksiztencën e shqipes gegnisht apo toskërisht, do të duhet të kishim një model para vetes. Dhe pa diskutim ai është Kostandin Kristoforidhi, i cili i lëvroi shkencërisht dhe me një pasion magjepsës të dy format e shqipes toske dhe gege. Këtë na e kujton studjuesi i apasionuar prof. Xhevat Lloshi në 190 vjetorin e lindjes së Kritoforidhit, duke sjellë para lexuesit një pjesë të kolanës së shkrimeve dhe përkthimeve të transkriptuara të tij duke hedhur dritë gjithashtu mbi këtë personalitet të mbiquajtur si babain e gjuhës shqipe.
“Kristoforidhi pasi botoi abetaren donte të bënte gjithshka për gjuhën shqipe. Kjo është arsyeja që i ka dhënë vetes të drejtën të vetëlëvdohet “babai i gjuhës shqipe”” tha Prof. Xhevat Lloshi. Sipas tij Kristoforidhi bëri abetaren, përkthimet, në 1882 botoi gramatikën e më pas punoi gjithë kohën për fjalorin, ndërsa mendonte të botonte gjithmonë libra të tjerë për shkolla.
Studjuesi arrin ta shndërrojë ligjëratën e tij në një rrugëtim të apasionuar për shqipen dhe historinë e saj duke na rrëfyer se sa leje të rëndësishme janë marrë deri në Portën e Lartë për të botuar abetaren e parë shqipe, shqipërimin e dhjatës se re apo dhe botimin e psallmeve në shqip.
Kostantin Kristoforidhi ishte përkthyes i Biblës, filolog, studiues i gjuhës shqipe dhe veprimtar thelbësor i Rilindjes Kombëtare. Ai lindi në Elbasan dhe mësoi në gjimnazin e Janinës, dhe më pas mësues, madje edhe i themeluesit të albanologjisë, Johan Georg fon Hanit. Udhëtimet e tij e çuan në Izmir, në Stamboll e më pas në Maltë. Në Stamboll nis bashkëpunimin me Aleksandër Tomsonin të Shoqërisë Biblike të Londrës, madje thuhej se myslimanët shqiptare ishin ata që me fort blinin dhjatën e re dhe mësonin shqipen përmes saj. Gjatë kësaj periudhe Kristoforidhi përhapi me sukses të madh abetaren e tij dhe libra të tjerë. Në këtë përvjetor të Kostandin Kristoforidhit, Biblioteka Kombëtare fton publikun të njihet me editimin digjital të veprës "Gjahu i malësorëvet", tregimin e parë të prozës artistike shqipe, shkruar nga autori në dy dialektet e shqipes, gegnisht dhe toskërisht.

Londër; Nderohen viktimat e sulmit terrorist

Posted: 06 Jun 2017 05:01 AM PDT

Qytetarët e Londrës mbajtën sot 1 minutë heshtje për viktimat e sulmit terrorist të natës së të shtunës. Njerëzit u ndalën në orën 11 në vendet ku u shënuan viktima dhe mjedise të tjera të qytetit në shenjë respekti. Ndërkohë në kryeqytet dhe në mbarë Britaninë, masat e sigurisë vazhdojnë të mbeten të larta. Policia tha se e ka kufizuar hetimin mbi sulmin terrorist te një person dhe i ka liruar 12 të arrestuarit pas vlerësimit se ata nuk kanë gisht në këtë komplot terrorist. Më shumë se 130 imamë të Britanisë nuk kanë pranuar të kryejnë ritualet fetare të ceremonive mortore për tre personat qe kryen sulmin terrorist. Në sulmin e të shtunës vdiqën 7 persona dhe u plagosën 48 të tjerë, 36 prej tyre janë ende në spital dhe 18 në gjendje kritike.

Basha shqiptarëve: Bashkohuni me republikën e re se është republika juaj!

Posted: 06 Jun 2017 04:49 AM PDT

Në takimin me banorë të njësisë 4 dhe 8 të Tiranës, kreu i opozitës dhe pretendenti për kryeministër Lulzim Basha, akuzoi kryeministrin aktual Edi Rama për premtime të pambajtuara dhe mungesë alternative për të qeverisur. Kjo është edhe arsyeja theksoi zoti Basha, që Rama shmang debatin publik, ndërsa zotohet para banorëve të kësaj zone se nuk do të lejojë Ramën ti shmanget kësaj përgjegjësie. “Ja ku jam këtu, në këtë rrugë të lagjes time të vjetër, duke ju parë në sy e duke ju thënë se unë nuk kam ndër mend ta lejoj që ta marri fushatën për hunde, se me 25 qershor është dita e llogaridhënies për 300 mijë vendet e punës që nuk i hapi, për taksat që i rriti, për faturat e energjisë që i rriti, për shëndetësinë në kolaps” tha zoti Basha.
Kreu i PD dhe i së djathtës bëri thirrje për një bashkim të madh të shqiptarëve. Ai beson se ka perënduar koha e Ramës dhe Metës dhe se është ora e së djathtës që do të zbatojë sikundër tha vizionin e Republikës së re, me në qendër interesin qytetar. “PS e ka bërë të vetën, Rama e ka bërë të vetën duke i robëtuar dhe shkatërruar ekonomikisht, duke u përpjekur ti kthejë në skllevër ekonomikë të pushtetit. LSI e ka bërë të vetën duke i skllavëruar m e teserat e partisë si triskë buke. Por ky është momenti i zgjimit të madh, i bashkimit të madh. Shqipëria është në këmbë dhe thirrja ime ndaj çdo kujt është bashkohuni me Republikën e re se është republika juaj” tha zoti Basha.

Ujërat e zeza notojnë në liqenin e Prespës

Posted: 06 Jun 2017 04:08 AM PDT

Bashkia e Pustecit është e përbërë nga 9 fshatra. Për shkak të mungesës së kanalizimeve në 7 fshatra, banorët janë të detyruar që ujërat e zeza t’i derdhin në Liqenin e Prespës. Ndotja e Liqenit të Prespës nga depozitimi i ujërave të zeza mbetet problem shqetësues për banorët e kësaj zone të shpallur Park Kombëtar : Në liqen shkojnë njerëz të ndryshëm dhe një pjesë e mirë e tyre i lëshojnë mbeturinat ku t’iu vijë për mbarë. Kjo është situatë shumë shqetësuese. Ajo çka është më e keqja është se ujërat rrjedhin në liqen. Kjo është katastrofë. Nuk durohet as nga ne banorët e aq më pak nga turistat që vijnë për të kryer pushimet. Gjithë fshati Goricë e Vogël, furnizohet me ujë të pijshëm nga liqeni, ku derdhen ujërat e zeza. Këtu marrim ujë për të pirë dhe analiza nuk ka bërë kush, për të parë a është i pijshëm apo jo. Keni bërë kërkesë në bashki dhe asnjë zgjidhje nuk kemi patur." Në Ditën Ndërkombëtare të Mjedisit, Agjensia Kombëtare e Zonave të Mbrojtura nisi punën për pastrimin gropave septike dhe pastrimin e liqenit nga mbetjet e ngurta: "Në të gjithë territorin e vendit kjo është një nga problematikat kryesore dhe është një nga dy gjërat kryesore ku ne duam të konsistojmë, bashkë me liqenin.” E ndërsa synohet që Prespa të bëhet pjesë e intenerarit turistik të zonës së Korçës, ende nuk ka një afat, se kur do zgjidhet problemi kryesor që pengon këtë, rrjeti i kanalizimeve në 7 fshatra të Bashkisë Pustec.

Volejboll, Tuci: Kombëtarja privilegj dhe sfidë!

Posted: 06 Jun 2017 04:00 AM PDT

Është një nga lojtaret me më tepër përvojë në ekipin kombëtar të volejbollit të femrave të Shqipërisë. Por për Esmeralda Tucin, thirrja në fanellën kuqezi është sa privilegj edhe sfidë. Bashkë me shoqet ajo vijon stërvitjen në mjediset e reja të Sallës Sportive "Feti Borova" në Parkun Olimpik të Tiranës, në përgatitje për ndeshjet e grupit A të Ligës së Evropës, ku Shqipëria do të përballet me Bjellorusinë, Finlandën dhe Austrinë.
“Si lojtare e vjetër e ekipit kombëtar, pasi kam shumë vite që luaj, është privilegj, por edhe barrë shumë e madhe” thotë ajo për RTSH. “Gjithmonë është emocion i veçantë çdo vit që ne grumbullohemi” shton Tuci.
Volejbollistja 31-vjeçare thekson se grupi po e jep maksimumin në stërvitje. “Grupi është shumë i mirë, mendojmë të bëjmë maksimumin. Po stërvitemi dy herë në ditë dhe shpresojmë të kemi rezultate të kënaqshme” shprehet volejbollistja e kombëtares.
Për këtë arsye, ajo beson në një paraqitje të kënaqshme në Ligën e Evropës. “Pavarësisht se grupi është pak i fortë ne do bëjmë maksimumin” premton Esmeralda Tuci.
Ndeshjet e grupit A të Ligës së Evropës do të luhen nga data 9, deri më 11 qershor 2017 në Shqipëri dhe nga data 16, deri më 18 qershor 2017 në Bjellorusi dhe do të sillen për sportdashësit drejtpërdrejt nga Rrjeti i Radio-Televizionit Shqiptar.