Home » » RTSH: “Hojt Brajan Ji u takua me presidentin Ivanov” plus 9 more

RTSH: “Hojt Brajan Ji u takua me presidentin Ivanov” plus 9 more

RTSH: “Hojt Brajan Ji u takua me presidentin Ivanov” plus 9 more

Hojt Brajan Ji u takua me presidentin Ivanov

Posted: 01 May 2017 06:23 AM PDT

Zv/ndihmës sekretari i Departamentit Amerikan të Shtetit për Evropën dhe Euroazinë, Hojt Brajan Ji, ditën e dytë të vizitës në Maqedoni e filloi me takimin me presidentin George Ivanov. Zoti Ji foli me kreun e shtetit për krizën politike, formimin e qeverisë së re dhe hapat që duhen ndërmarrë për të kapërcyer ngecjen në reformat euroatlantike të Maqedonisë. Takimi ndodhi një ditë pasi zyrtari i lartë i departamentit amerikan të shtetit takoi udhëheqësit e partive politike. Pas takimit me Ivanovin, zoti Ji u takua me kryetarin e ri të Kuvendit të Maqedonisë, Talat Xhaferri, të cilit i konfirmoi mbështetjen për shumicën e re parlamenmtare. Pas takimit, zoti Xhaferri u shpreh se ai do të jetë kryeparlamentari i të gjithë deputetëve pa marrë parasysh orientimet partiake. Zoti Xhaferri u uroi shërim të shpejtë edhe të plagosurve gjatë trazirave në mjediset e parlamentit të Maqedonisë.

 

Si festohet 1 maji nëpër botë?

Posted: 01 May 2017 06:12 AM PDT

Në mbarë botën, punëtorët përkujtuan sot 1 majin, ditën e tyre, duke kërkuar respektimin e të drejtave. Sipas traditës shekullore, në shumicën e vendeve dita shënohet me protesta e marrshime. Në Stamboll, dhjetëra mijëra njerëz marshuan dret sheshit Taksim me flamuj e parrulla në duar. Në disa organizime më të vogla me organizata majtiste pati përplasje me policinë. Në vendet e amerikës latine, protestat kanë qënë gjithandej masive e për shkak të kushteve jo të mira ekonomike të klasës punëtore dhe e krizave të herë pas hershme. Në Venezuelë, ku protestat kanë shkaktuar rreth 30 viktima gjatë javës së kaluar, presidenti i venezueles Nikolas Maduro, lajmëroi rritjen nga sot të pagave minimale me 60 % si dhe shpërndarjen falas të qindra apartamenteve falas për familjet në nevojë strehimi. Në Rusi, tradita e periudhes sovjetike me parakalime festive për 1 majin nuk është harruar. Në sheshin e Kuq në Moskë, rreth 130 mijë njerëz parakaluan në një veprimtari organizuar nga kryetari i bashkisë. Parakalimi u mbajt nën moton për punë, rroga e jetë të drejtë. Kurse në Korenë komuniste të veriut, 1 maji është ditë feste. Punëtorët u organizuan sipas ndërmarrjeve dhe morën pjesë në veprimtari sportive dhe argëtuese, duke uruar partinë për përmbushjen e të gjitha kushteve për punë dhe me parrullat kundër imperializmit. Origjina e 1 majit si ditë e punëtorëve vjen nga lufta e klasës punëtore për të siguruar një orar pune tetë orësh. Në Shtetet e Bashkuara, sindikatat organizuan me 1 maj 1886 nje grevë te përgjithshme. Në Cikago, punëtorët u përleshen me policinë dhe në trazira pati shumë viktima. Më pas, në takimin e internacionales së dytë socialiste, të vitit 1889, në Paris, u vendos që për çdo 1 maj të mbaheshin manifestime në të cilat do të kërkohej shkurtimi në 8 orë i orarit të punës, pasi që në atë kohë orari i punës në vendet e zhvilluara ishte 10 orë ose më shumë. 1 maji përkujtohet në shumicën e vendeve të botës si dita e punëtorëve prej gati 100 vjetësh.

Vlora në pritje të Botërorit të Aeronautikës

Posted: 01 May 2017 05:58 AM PDT

Vlora po përgatitet të mirëpresë Botërorin e Aeronautikës, në disiplinën fluturime me preçizion. Prej disa ditësh, pilotët që do të marrin pjesë kanë nisur të tejmbushin qytetin, duke nisur provat në zonën e plazhit të ri përgjatë Lungomares.
“Ky është një aktivitet i rëndësishëm. Kam qenë disa herë në Vlorë dhe jam i kënaqur që rikthehem. Jemi duke bërë prova sepse edhe pak ditë nis botërori. Jam anëtar i kombëtares së aeronautikës së Sllovenisë. Shpresoj që ky do të jetë një aktivite shumë i bukur” thekson garuesi slloven.
“Vij nga Mbretëria e Bashkuar. Kjo është hera ime e parë që vij në Shqipëri. Jam i kënaqur që jam këtu dhe uroj që të zhvillohet një kampionat i bukur. Vlora është fantastike, natyra, gjithçka. Nganjëherë edhe ne trembemi kur fluturojmë, kryesisht në start, por ky është një sport i sigurt që gjithsecili mund ta ushtrojë” shprehet piloti britanik.
Ndërsa nga Rusia ka mbërritur në qytetin bregdetar, një pilot 17-vjeçar, i cili ka shprehur përshtypjet e tij për botërorin dhe qytetin e Vlorës. “Jam 17 vjeç, e fluturimin e kam nisur që kur kam qenë fëmijë i shoqëruar nga babai im. Pasi ai është shumë i apasionuar pas fluturimit. Vij nga Rusia dhe kjo është gara e parë që marr pjesë në një botëror. Fluturimi është sikur të përjetosh një ëndërr. Vlora më pëlqen shumë, është shumë paqe këtu” tha ai.
Kur kanë mbetur edhe 4 ditë nga nisja e botërorit, pilotët e ardhur deri tani vazhdojnë me intensitet provat në qytetin bregdetar.

SHBA: Tornadot shkaktojnë dhjetëra viktima

Posted: 01 May 2017 05:56 AM PDT

Moti i keq i shoqëruar me disa tornado shkaktoi gjatë natës të paktën 14 të vdekur në jug dhe në qendër të Shteteve të Bashkuara. Si pasojë e erës së fortë u shkatërruan shumë shtëpi, makina, si dhe u thyen pemë e shtylla elektrike. Në Teksas, shërbimi Kombëtar Meteorologjik numëroi të paktën katër tornado të shoqëruara edhe me reshje të dendura shiu. Në qytetin Canton, moti i keq shënoi katër të vdekur. Në Arkansas u raportuan pesë viktima, njoftuan shërbimet e emergjencës ndërsa dy të vdekur u konfirmuan në Misisipi, përfshirë një fëmijë. Reshjet e shumta të shiut shkaktuan dy viktima në Misuri ndërsa numri i të plagosurve për shkak të motit të keq është rreth 50.

Itali: Mateo Renzi zgjidhet kryetar i Partisë Demokratike

Posted: 01 May 2017 05:50 AM PDT

Ish kryeministri italian Mateo Renzi u zgjodh kryetar i Partisë Demokratike në qeverisje. Renzi u zgjodh kryetar i partisë me 70% të votave të anëtarëve. Pozicioni politik e nxjerr sërish Mateo Renzin në ballë të skenës politike italiane. Ai dha dorëheqjen pas dështimit të një referendumi për reforma vitin e shkuar. Renzi falenderoi pjesëmarrësit që bënë të mundur votimin, zgjedhjen e lirë dhe demokracinë brenda partisë.

 

Francë: Profili i Brizhit Tronjë

Posted: 01 May 2017 05:24 AM PDT

Ditën e votimeve të raundit të parë të zgjedhjeve presidenciale në Francë më 23 prill, kandidati Emanyel Makron 39 vjeçar gati nuk ia lëshoi dorën gruas së tij Brizhite, 64 vjeçare. Dallimi mbi 24 vjet në moshë mes tyre doli në pah nga shumë media dhe në biseda njerëzish, po çfarë dihet më tepër për gruan që pritet të bëhet zonja e parë e Francës? Brizhit Tronjë lindi në qytezën Amiens në një familje të pasur, pronare e një fabrike çokollatash. Ka 3 fëmijë me bashkëshortin e parë dhe, deri para dy vitesh, punonte si mësuese. Çifti i famshëm i Francës është njohur kur nxënësi i atëhershëm 17-vjeçar Emanyel Makron dhe mësuesja 41-vjeçare punonin së bashku për vënien në skenë të pjesës "Arti i Komedisë", kohë gjatë së cilës lindi edhe dashuria mes tyre. U martuan në vitin 2007. Kur Makroni u bë person i njohur publik, francezët fillimisht e paten të vështirë të mësoheshin me çiftin me dallim moshe. Tani kjo lidhje e pazakontë nuk habit më njeri, madje femrat e quajnë të guximshëm përkushtimin publik të Makronit për këtë grua. Brizhit Makron e ka ndihmuar shumë bashkëshortin në fushatën zgjedhore. Ajo ka luajtur rol aktiv edhe në strategjinë e fushatës dhe në organizimin e takimeve publike. Madje, ajo bën edhe shaka me moshën e saj. Pse duhet të zgjidhet Makroni president këtë vit? Sepse 2022 është shumë vonë, mendoni pak si do të dukem unë në atë vit, thotë ajo.

Vazhdojnë ndryshimet në kupolën e Policisë së Shtetit

Posted: 01 May 2017 05:06 AM PDT

Shkarkimet në nivele të ndryshme drejtuese të Policisë së Shtetit kanë vazhduar. Me urdhër të drejtorit të përgjithshëm të Policisë së shtetit janë shkarkuar nga detyra Drejtori i Kufirit dhe Migracionit në Durrës, Boke Budini dhe në  vënd të tij është emëruar Lindida Nushi. Shkak për firmosjen e shkarkimit të tij mësohet se është bërë dhe sasia prej 10 ton drogë të zbuluar pak kohë më parë nga policia italiane, sasi e cila dyshohet të ketë kaluar nga porti më i madh në vënd. Ndërkohë mësohet se është larguar nga detyra edhe drejtori i laboratorit të kriminalistikës Dritan Zoto. Pas ndryshimit të kreut të Ministrisë së Brendshme, ardhjes në këtë post të zotit Fatmir Xhafaj,  ky është shkarkimi i 30 i drejtuesve të lartë në Policinë e Shtetit. Po kështu janë ndryshuar 10 drejtorë qarqesh si dhe 29 drejtues të tjerë krysisht shefa hetimi dhe shefa kufiri.

Protesta të vakëta të punonjësve shqiptarë më 1 maj

Posted: 01 May 2017 04:41 AM PDT

Edhe këtë 1 maj, klasa e punëtore shqiptare dëshmoi se mbetet ende larg kulturës së organizmit dhe protestuarit për të drejtat e saj. Në qendër të Tiranës, në një organizim tepër modest për nga pjesëmarrja, disa sindikalistë protestuan për probleme të mprehta të statusit të punëtorit në Shqipëri.
“Ne nuk kemi minimumin jetik. Punonjësit nuk paguhen sipas ligjit. Ka pasiguri në vendin e punës. Në çdo moment çdo punonjës është i rrezikuar nga kapriçot e punëdhënësit” tha një prej folësve në miting.
Shumë prej punëtorëve shqiptarë, 1 maji i sivjetshëm, i shënuar në kalendar si ditë zyrtare pushimi, i gjeti ata në punë dhe kjo ishte një tjetër arsye e protestës. “Sot më datë 1 maj u është kërkuar grave dhe vajzave të dalin në punë në fabrikat e këpucëve dhe tekstileve. Ato kanë në fakt të drejtën e tyre të protestës më datë 1 maj” tha një folëse në miting. “Puna në ditët e pushimit është një fakt tashmë në këtë sektor dhe kjo punë nuk ka kurfarë ndryshimi në pagë sipas kodit të punës” shtoi ajo.
Fokusi i protestës ishte paga minimale për sektorin privat, ende e papërcaktuar nga qeveria, por e papranuar në masën që propozohet prej saj. Për këtë Kol Nikolla kreu i sindikatave shqiptare , paralajmëroi nisjen e protestave prej javës që vjen.”Nuk do të heqim dorë pa shkuar paga minimale 28 mijë lekë, sidomos në sistemin arsimor, shëndetësor që janë publike, madje do të kemi dhe greva një orëshe, apo një ditore për këtë problem” tha zoti Nikolla.
Respektimi i të drejtave të punetorëve, duke filluar nga paga, veçanërisht në aktivitetet e fasonerisë e industrinë nxjerrëse mbetet një prej problematikave më të mprehta të tregut të punës në Shqipëri.

Basha: Më 7 maj nis mosbindja civile, përfundon më 18 qershor!

Posted: 01 May 2017 03:24 AM PDT

Kreu i opozitës së djathtë Lulëzim Basha ka paralajmëruar nisjen e mosbindjes civile, e cila sipas tij do të synojë rrëzimin e republikës së vjetër të kryeministrit Rama. Duke folur të hënën nga çadra e protestës para selisë së qeverisë, zoti Basha në një fjalim, i cili më së shumti i drejtohej në vetë të parë zotit Rama, tha se aksioni do të nisi më 7 maj, ditën e votimeve në Kavajë dhe do të shtrihet më pas në të gjithë Shqipërinë deri më 18 qershor. “Sot do të planifikojmë me detaje bashkimin më të madh të shqiptarëve të dielën e ardhshme në Kavajë më 7 maj për të çliruar me forcën e bashkimit Kavajën nga krimi, droga e zgjedhjet fasadë” tha zoti Basha. “Çfarëdo që të kesh planifikuar më 18 qershor, nuk do të qeverisësh asnjë orë të vetme pas 18 qershorit. Lëvizja popullore e bashkuar është totalisht e vendosur për republikën e re ndaj ke vetëm një rrugë: bëhu pjesë e zgjidhjes ose shporru bashkë me republikën e vjetër” ju drejtua zoti Basha kryeministrit socialist.
Deklaratat e zotit Basha vijnë pasi kundërshtari i tij zoti Rama i ka përsëritur orët e fundit thirrjen për pjesmarrjen në votimet për zgjedhjet e përgjithshme të 18 qershorit. Madje ai u shpreh i bindur se PD e opozitës do të hyjë në zgjedhje. ” Ne do t’i krijojmë mundësi PD që të regjistrohet edhe jashtë afatit” tha zoti Rama .

Pejiç – makina e golave

Posted: 01 May 2017 02:56 AM PDT

Historia e golashënuesve të Kampionatit Kombëtar të Futbollit përfshin disa emra mbresëlënës. Dhe në 10-shen e parë të tyre është edhe një huaj. Pero Pejiç është tashmë 35 vjeç dhe në vitin e tij të 10-të të tij në Shqipëri, me ndonjë ndërprejre të shkurtër, është shndërruar padyshim në një nga lojtarët më të spikatur të 17 viteve të para të këtij mijëvjeçari.
Që nga ai gol i parë më 28 prilli të vitit 2007, ku skuadra e tij e parë shqiptare, Dinamo, mundej 1-2 në derbin me Tiranën, kroati nuk ka rreshtur së shënuari. 6 gola në 13 ndeshje në atë gjysmësezon në vend të 5-të me Dinamon, janë preludi i 18 golave në 31 ndeshje në sezonin 2007-2008, që u mbyll me kurorën e kampionit me blutë kryeqytetas.
Pejiç do të rikthehet në verë të 2010-tës në Shqipëri, këtë radhë me fanellën e Tiranës, duke shënuar 16 gola në 36 ndeshje me bardheblutë dhe duke fituar Kupën e Shqipërisë.
Pas një mungese të shkurtër, rikthehet në sezonin 2012-2012 me Flamurtarin, për të cilin realizon 15 gola në 23 takime.
Nga Vlora, ai zhvendoset për dy sezone në Korçë, ku ka kulmin e vet. Ai fiton dy herë kampionatin, si dhe një herë Superkupën e Shqipërisë, duke shënuar në total plot 40 gola në 68 ndeshje me Skënderbeun.
Kalon më pas në Kukës, në sezonin 2014-2015 dhe 2015-2016, duke shënuar 38 gola në 45 ndeshje, përfshi 31 gola të realizuar brenda një sezoni të vetëm, dhe duke fituar edhe Superkupën në 2016-n. Rikthimi i tij tek Kukësi këtë sezon nuk ka qenë më pak produktiv, pasi kroati, edhe pse tanimë 35 vjeç, mbetet po aq i vendosur, duke shënuar plot 22 herë në 25 ndeshje dhe duke e mbajtur Kukësin në betejën për titull. Pas Dinamos në Shqipërinë e Mesme dhe Skënderbeut në atë Juglindore, golashënuesi kroat duket se po kërkon ta shijojë titullin edhe në verilindje.
Megjithatë, kur gjithçka do të sqarohet pas 5 javësh, ajo që mbetet e sigurt është se Pero Pejiç mbetet një makinë golash.