Home » » RTSH: “Hahn deklaratë publike: Shpreh keqardhje të thellë për vendimin e opozitës, por procesi demokratik duhet të vazhdojë” plus 8 more

RTSH: “Hahn deklaratë publike: Shpreh keqardhje të thellë për vendimin e opozitës, por procesi demokratik duhet të vazhdojë” plus 8 more

RTSH: “Hahn deklaratë publike: Shpreh keqardhje të thellë për vendimin e opozitës, por procesi demokratik duhet të vazhdojë” plus 8 more

Hahn deklaratë publike: Shpreh keqardhje të thellë për vendimin e opozitës, por procesi demokratik duhet të vazhdojë

Posted: 11 May 2017 11:51 AM PDT

"Me tepër shqetësim të madh", Komisioneri Johannes Hahn ju drejtohet qytetarëve shqipëtarë përmes një deklarate publike, ku shpreh keqardhjen për vendimin e opozitës për të mos marrë pjesë në zgjedhjet e 18 Qershorit, në përfundim të përpjekjeve disa-javore të partnerëve ndërkombëtarë për të kundërtën.
"Gjatë javëve të fundit, janë bërë disa përpjekje për të nxitur dialogun midis partive politike në Shqipëri, nga përfaqësues të BE-së, përfshirë veten dhe partnerët e tjerë ndërkombëtarë.
Ne kemi dëgjuar me kujdes shqetësimet dhe pritjet nga të gjitha anët, duke u përpjekur për të lehtësuar një zgjidhje të krizës në vazhdim.
"U ofruan një numër opsionesh, me shpresën që partitë dhe udhëheqësit të gjallëronin përgjegjësinë e tyre për të gjetur një zgjidhje të përbashkët.
Për fat të keq, ky nuk ishte rasti. Pra, sot jemi në një situatë ku është vënë në lëvizje procesi zgjedhor për zgjedhjet e përgjithshme, më 18 qershor. Zgjedhjet do të zhvillohen pa pjesëmarrjen e partive kryesore të opozitës.
Ishte zgjedhja e qëllimshme e opozitës aktuale për të mos kandiduar për zgjedhje. Unë duhet të respektoj, por në të njëjtën kohë të shpreh keqardhje të thellë për këtë vendim nga pikëpamja demokratike. Shqiptarët kërkojnë dhe meritojnë zgjedhje që ofrojnë një ofertë të gjerë politike dhe mbajnë standardet zgjedhore. Megjithatë, procesi demokratik duhet të vazhdojë, edhe nëse disa vendosin të qëndrojnë prapa.
Demokracia dhe standardet demokratike nuk do të pengohen duke bojkotuar institucionet dhe zgjedhjet demokratike. Zgjedhjet do të vlerësohen sipas meritave të tyre, bazuar në standardet ndërkombëtare."
Komisioneri austriak përsërit mbështetjen e plotë ndaj institucionit kompetent për vëzhgimin e zgjedhjeve, ODIHR, dhe pret nga të gjitha institucionet përkatëse vendase që të sigurojnë bashkëpunim e transparencë të plotë me të. Hahn bën thirrje kundër veprimeve që do të cënonin të drejtën e votës së qytetarëve dhe, në vijim të kritikave, kujton se mungesa e zgjedhjeve të Kavajës shënoi "humbje për demokracinë".
"Prandaj, le të bëhem i qartë edhe për një gjë: dënoj fuqishëm çdo njoftim për të thirrur për “veprime” që do të dëmtonin të drejtën e çdo qytetari për të votuar dhe liritë e tjera themelore. Këto “veprime” nuk mund të justifikohen dhe nuk janë në përputhje me standardet e Bashkimit Europian.
Përkundrazi, është një vlerë thelbësore europiane që idetë dhe propozimet politike – pa marrë parasysh nëse ju pëlqejnë apo jo – të diskutohen brenda institucioneve demokratike, veçanërisht në parlamentin shqiptar. Kjo është theksuar në të gjitha takimet me udhëheqësit politikë të vendit tuaj, nga të gjitha anët.
Në lidhje me këtë, më lejoni të them edhe një gjë. Fakti që zgjedhjet në Kavajë nuk mund të zhvilloheshin nuk është një fitore për askënd. Kjo është një humbje e qartë për demokracinë."
Në përfundim të mesazhit të tij, Komisioneri Hahn shprehet besimplotë se qytetarët shqipëtarë "do të kërkojnë nga drejtuesit e tyre politikë që të demonstrojnë përmbajtjen dhe maturinë e pritshme demokratike", duke siguruar për monitorimin nga afër të procesit zgjedhor dhe për vazhdimin e mbështetjes së vendit në rrugën drejt anëtarësimit në BE. "Le të jemi të qartë: Udhëheqësit do të mbahen përgjegjës nëse përpiqen të shmangin aspiratat legjitime të popullit shqiptar për një të ardhme më të mirë" shprehet Komisioneri Johannes Hahn.

Konçesionet Beqja, prokuroria pushon hetimet

Posted: 11 May 2017 07:12 AM PDT

Prokuroria e Tiranës njoftoi se ka vendosur të pushojë hetimet për ish-Ministrin e Shëndetësisë Ilir Beqaj i akuzuar për "shpërdorim detyre" në lidhje me dhënien me koncesion të tre shërbimeve në vlerë 300 milion dollarësh.
Vendimi u mor pas rreth një vit hetimesh nga njësia Task-Forcë e Prokurorisë së Tiranës. Konçesionet që u hetuan ishin kontrollit mjekësor me vlerë 120 milionë euro, konçesioni i hemodializës me vlerë 86 milionë dollarë, si dhe konçesioni i sterilizimit të pajisjeve kirugjikale me vlerë 100 milionë dollarë.
Sipas organit të akuzës, nuk u gjetën elementë të veprës penale dhe çdo vendim i Ministrisë rezulton te jete marrë në bazë të ligjit. Hetimet nisen pas akuzave të bëra nga Partia Demokratike.

Çështja Vllahutin, KE: “Thirrjet për dhunë dhe gjuha e urrejtjes janë të papranueshme”

Posted: 11 May 2017 07:07 AM PDT

Komisioni Evropian ka reaguar i pyetur nga media investigative BIRN për kërcënimet e bëra në adresë të ambasadorës së BE-së në Tiranë, Romana Vlahutin. "Thirrjet për dhunë dhe gjuha e urrejtjes janë të papranueshme" thuhet në qëndrimin pas interesimit të gazetarëve.
"Kërcënimet synojnë të frikësojnë ambasadoren që të bëjë punën e saj, e cila vitin e fundit është fokusuar tek Reforma në Drejtësi në Shqipëri", citohet qëndrimi i institucionit qendror europian.
"Bashkimi Evropian shpreson se opinioni publik shqiptar do të jetë në anën e ambasadores në këtë betejë, dhe të dënojë gjuhën e urrejtjes dhe përpjekjet për të frikësuar diplomaten e lartë" vlerëson KE.
Reagime kane ardhur publikisht edhe nga avokati i popullit në Shqipëri Igli Totozani, drejtoresha për Ballkanin perendimor Ruiz Calavera dhe shefi i stafit të komisionerit Hahn.

Ulja e TVSH në turizëm, FMN : Zbatoni ligjin, pastaj ulni taksat!

Posted: 11 May 2017 06:58 AM PDT

Deklarimi i përfaqësuesit të zyrës së FMN në Tiranë se "Pjesa më e madhe e ndërmarrjeve në sektorin e turizmit nuk paguajne TVSH" dhe rekomandimi i tij se "do të kishte qënë më mirë që të ishte filluar nga përmirësimi i zbatimit të ligjit të turizmit, sepse do kishte pasur më shumë përfitime nga pikëpamja e të ardhurave" sjell në vëmendje një tjetër mosdakortësi mes autoritetit të lartë të Uashingtonit dhe qeverisë shqiptare, pasi kjo e fundit sapo ka vendosur reduktimin e taksës së tatimit mbi vlerën e shtuar në 6 përqind nga 20 përqind.
Edhe më parë Radio Televizioni Shqiptar ka theksuar se në sektorin e turizmit në Shqipëri, informaliteti është i lartë, i pallogaritur ndonjëherë dhe vlerësohet si shkaku kryesor i mungesës së konkurrueshmërisë në këtë sektor. Në një relacion dorëzuar në Komisionin e Veprimtarive Prodhuese në Kuvendit, evidentohet fakti se 90 përqind e shtretërve në njësitë akomoduese nuk paguajnë taksa.
Ndërkohë, sipas të dhënave nga INSTAT, numri i strukturave akomoduese për vitin 2015 ka qenë 1.116, ose 27 përqind më i rritur se në 2014. Kjo vërteton faktin që rritja e numrit të vizitorëve përgjatë viteve të fundit ka ndikuar rrjedhimisht dhe në rritjen e kërkesave për akomodim.
Nga të dhëna paraprake, bazuar në anketimet e INSTAT dhe përllogaritjet e MZHETTS, numri i strukturave akomoduese për vitin 2016 vlerësohet në 1.273, duke u rritur me 14 përqind më shumë se viti 2015.
Duke pasur një tjetër referencë, pra duke iu referuar Booking.com, numri i strukturave akomoduese të regjistruara në këtë websajt në Shqipëri për vitin 2016 është 1.356, ose 83 njësi më shumë se sa llogaritjet e ministrisë përgjegjëse të turizmit. Ndër to 1.192 janë Hotele dhe 164 struktura akomoduese të tjera.
Mjaft i lartë rezulton numri i shtretërve dhe i netëqëndrimeve në hotele. Për vitin 2015 ka qenë respektivisht rreth 42 mijë shtretër dhe 791.000 netë. Për vitin 2016, sipas parashikimeve, ende jo zyrtare nga INSTAT dhe MZHETTS numri i shtretërve është rreth 67.000, ose 25 mijë më shumë, kurse numri i netëqëndrimeve ka patur një rritje të konsiderueshme me 72 përqind përgjatë vitit 2015 krahasuar me 2014. Nga të dhënat paraprake numri i netëqendrimeve për vitin 2016 llogaritet me përafërsi rreth 47 përqind më shumë se në vitin 2015.
Në një llogaritje të thjeshtë, kur nga autoritetet deklarohen afërsisht 20 milionë netë fjetjeje në vit në Shqipëri, nga të cilat 10 milionë gjenerohen nga hotelet, duhet që, vetëm nga tatimi mbi vlerën e shtuar 20 përqind, për shtrat/natë, do të akumuloheshin, vetëm nga hotelet, 30 milionë Euro. Ministria e Financave thotë se viti 2016 kapi rekord në numrin e vizitorëve me rreth 4.5 milionë dhe të ardhurat nga turizmi arritën shifrën rekord prej 1.5 miliardë euro. Por nuk e shpjegon këtë shifër.
RTSH i kërkoi zyrës së shtypit dhe më pas vetë ministrit Ahmetaj të komentonte këto shifra dhe komentin e bërë nga përfaqësuesi i FMN në Tiranë, por ministri nuk iu përgjigj kërkesës.

Junker: Anëtarësimi i Rumanisë në BE ka sjellë “paqe dhe stabilitet në kontinentin tonë”

Posted: 11 May 2017 06:48 AM PDT

Anëtarësimi i Rumanisë në Bashkimin Evropian ka sjellë “paqe dhe stabilitet në kontinentin tonë,” tha presidenti i Komisionit Evropian Xhan Klod Junker, i cili vizitoi sot Bukureshtin, me rastin e 10 vjetorit të anëtarësimit të Rumanisë në Bashkimin Evropian. Në një fjalim që mbajti në parlamentin vendas, zoti Junker tha se rumunët janë një popull i guximshëm dhe i përkushtuar. Anëtarësimi i Rumanisë në BE në vitin 2007 e zgjeroi shtrirjen e bllokut deri në Detin e Zi, tha ai. Në BE, kurrë nuk i kemi ndarë anëtarët në vende të dorës së parë e të dorës së dytë, tha Junker. Evropa ka qenë e ndarë në të kaluarën, dhe kjo nuk duhet të ndodhë përsëri. Ne mund të ecim përpara së bashku, por me ritme të ndryshme. Një Evropë me disa shpejtësi është e parashikuar në traktatet e saj. Ai shtoi se Rumania e meriton të jetë anëtare e zonës Shengen sa më shpejt të jetë e mundur. Juncker kujtoi se një nga objektivat që i ka vetes është që Mekanizmi për Bashkëpunim dhe Verifikim për Rumaninë dhe Bullgarinë të hiqet deri në fund të mandatit të tij.

Itali: Arrestohen 27 persona, 16 prej të cilëve shqiptarë

Posted: 11 May 2017 06:42 AM PDT

Policia italiane në kuadër të një operacioni të gjërë kundër krimit të organizuar, ka arrestuar 27 persona, të akuzuar për trafik droge, shfrytëzim prostitucioni, dhunë, vjedhje, armëmbajtje pa leje e tentativa vrasjeje. Operacioni që u shtri në Monza, Milano, Bergamo, Mantova, Asti dhe Mesina vuri në pranga edhe një numër qytetarësh shqiptarë, krahas disa italianëve dhe afrikanoverioreve. Të arrestuarit, 4 prej të cilëve u lanë në arret shtëpie dhe të tjerët u dërguan në burg, janë pjesë e një grupi të strukturuar kriminal që vepronte në provincat e Monzës dhe Milanos. Operacioni i koduar "Velarium", sipas mediave italiane nisi pas përpjekjes për vrasjen e një të riu shqiptar, i cili u godit me thikë nga dy bashkëkombas, më shtator 2015 për pazare droge. Hetuesit zbuluan një rrjet të tërë të shpërndarjes së drogës, pjesë e të cilit ishte edhe një familje shqiptare, mes personave të tjerë. Nën hetim gjenden 40 persona, 16 prej të cilëve shqiptarë me leje të rregullt qëndrimi në itali.

Fushata zgjedhore, Xhafaj pret ambasadorët

Posted: 11 May 2017 06:39 AM PDT

Tre diplomatët më të rendësishëm në vend kanë zhvilluar këtë të enjte një takim me ministrin e Brendshëm Fatmir Xhafaj. Ambasadorët e Shteteve të Bashkuara të Anmerikës, OSBE-së dhe BE-së janë parë këtë mëngjes të hynë në zyrën e ministrit Xhafaj, ndërsa zyra e shtypit nuk ka dhënë detaje për arsyet e këtij takimi. Por  burime të besueshme thanë për RTSH se takimi është përqëndruar në lidhje me sigurinë dhe rendin në vend, sidomos kur pas dy ditësh opozita ka lajmëruar mbajtjen e një tubimi masiv në kryeqytet. Gjithashtu në takim është diskutuar për rolin e policisë në mbarvajtjen e  zgjedhjeve të përgjithshme të 18 qershorit.

Kolegji Zgjedhor pritet të vendosi për “18 Qershorin “

Posted: 11 May 2017 06:26 AM PDT

Kolegji Zgjedhor përcaktoi me short 5 gjyqtarët që kanë në dorë fatin e "18 qershorit", shqyrtimin e kërkesës për pavlefshmërinë e regjistrimit të listave të kandidatëve. Kërkesa e bërë nga Partia Agrare Ambientalise, si i vetmi subjekt opozitar i regjistruar në zgjedhje, ndërsa palë e interesuar në proçes janë dy partitë e mëdha. Shorti përzgjodhi 5 anëtarët e kolegjit që do shqyrtojnë kërkesën, pjesa më e madhe e të cilëve nuk ishin të pranishëm për arsye të ndryshme, por kishin përfaqësuesit që tërhoqën goglat. Shorti zgjodhi si relator të saj gjyqtarin Gjin Gjoni. Opozita këmbëngul se listat janë dorëzuar jashtë afateve ligjore, duke pretenduar se data përfundimtare ka qënë 28 prilli, në orën 24:00 dhe jo 29 prilli, ditë kur partitë dorëzuan listat me emrat e kandidatëve. PAA u regjistrua por më pas bëri kërkesë për çrregjistrim dhe nuk ka paraqitur listën e kandidatëve për deputetë. Kreu i KQZ-së, e cilëson si të padrejtë antikimim e kësaj Parti pasi nuk është regjistruar si subjekt zgjedhor.

 

Analistë e gazetarë kundër keqpërdorimit të fjalës së lirë

Posted: 11 May 2017 06:19 AM PDT

Përballja e opinionit publik ditën e martë me arrestimin e një gazetari për shkak të gjuhës fyese dhe nxitje së urrejtjes, ka shkaktuar reagime të ndryshme brenda komunitetit të gazetarëve. Që nga mosprekja e fjalës së lirë e deri te diskutimi se çfarë përfaqëson për këtë fjalë gazetari në fjalë, unioni i gazetarëve shqiptarë dhe gazetari i lirë Enkel Demi ballafaqojnë ide të ndryshme.

"Rasti i publicistit Myftaraj është një rast që ka shkaktuar ndjeshmëri të lartë publike për arrestimin, por kjo nuk do të thotë se ne si organizatë nuk distancohemi nga gjuha fyese, nga dhuna verbale në përgjithësi dhe nga krimi verbal që prevalon në të ashtu quajturin debat publik në shoqërinë e sotme shqiptare" tha kryetari unionit të gazetarëve Aleksandër Çipa.

Ndërsa gazetari Enkel Demi "ai që ka lëshuar ato fjalë për zonjën Vlahutin nuk është gazetar. Domethënë unë nuk mund të pranoj që ushtroj të njëjtin profesion si ai. Ai është përfaqësuesi tipik i gjirizit shqiptar ku për fat të keq media dhe rrjetet sociale i kanë dhënë zë ca njerëzve që janë të lojtur nga fiqiri. Ai duhet të iki të kurohet".

Ngjarja për të cilën shkrimtari i madh Ismail Kadare reagoi me autoritetin e tij krijues, që mori falenderimet e mbështetjen edhe të komisionerit Hahn, ka dhe anën tjetër të medaljes publike nëse konsiderohet shkak apo jo qëndrimi i përfaqësuesve ndërkombëtarë në vend.

"Ne si organizatë kemi një simpati për reagimin intelektual të shkrimtarit të madh Ismail Kadare i cili në emer të mbrojtjes dhe partneritetit me institucionalizmin ndërkombëtar dhe sidomos me diplomacinë preventive që është në shqipëri kerkon që të ketë distancime të kësaj natyre. Personalisht i përfshihem këtij distancimi" tha zoti Çipa.

"Unë vetë mendoj që zonja Vlahutin nuk ka qënë në lartësinë e duhur të një ambasadoreje te Bashkimit Europian por kjo nuk do të thotë që unë mund të marr përsipër të ngrej një koloni ndëshkimore për zonjën Vlahutin, për zotin Withers që ka qënë dikur ku ka pasur edhe ai një problematikë të kësaj natyre, për zotin Lu apo për çdo lloj mysafiri që ne e kemi të akredituar në shqipëri" tha nga ana e tij gazetari Enkel Demi.