Ju uroj nga zemra për këtë studim shkencor mjaft mbresëlënës që keni hedhur në faqet e internetit. Ky studim, për vlerat shkencore që ngërthen në vetvete, për tematikën që trajton, për analizat që bën me nervin e një hulumtuesi dhe njohësi që shkon deri në ashtin e problemit që zbërthen, është i barasvlershëm me përmasat e një disertacioni. Ky studim është një himn për shpirtrat e ndezur dhe për zemrat e gufuara të lebërve syçapkënë, të cilët, me këngën e tyre, të papërsëritshme në artin e vet në mbarë rruzullin tokësor, të emocionojnë dhe të ngrenë peshë në çaste e haresë së shpirtit dhe të qetësojnë rrahjet e zemrës kur të papriturat e jetës ta lëndojnë zemrën herë-herë. Me këtë studim, ju u keni bërë një homazh të shkëlqyer heronjve hijerëndë të këngës labe, të atyre që prehen në përjetësi dhe të atyre që i kemi midis nesh, mes të cilëve bie në sy edhe patrioti im i shquar smokthinjot i këngës labe, këngëtari mitik Tomorr Lelo, dhe ish-studenti im nga Kallarati Llambro Hysi, të cilët i kujtoj me një respekt të veçantë. Në këtë punim tuajin, mes studiuesve të folklorit, ju përmendni Profesorin Bardhosh Gaçe, mikun tim të vjetër, një figurë emblematike në fushën e historiografisë dhe të kulturës sonë kombëtare, si edhe profesorin tim të viteve të gjimnazit [1955-1959] "Ali Demi", Kozma Vasili, një profesor me përgatitje metodike shembullore dhe me një autoritet shkencor të padiskutueshëm.
Së fundi, dëshiroj të theksoj se kënga e zotërisë së nderuar Sinan Mullahu që e keni zgjedhur për ilustrim, me titull "O shokë, do zëmë një këngë", është mjaft e goditur dhe vargu i saj i dhimbshëm "Medet ne për mendjen tënë", simbolizon fatkeqësinë e rëndë kombëtare që na ka pllakosur që nga lashtësia pellazgoilire dhe deri në ditët tona: përçarjen ndëshqiptare. Këtë përçarje të mallkuar e kanë shfrytëzuar mjeshtërisht armiqtë tanë shekullorë - grekosllavizmi dhe Perëndimi evropian, të cilët, për fajin tonë të rëndë, na i katandisën trojet tona etnike sa një "kotec pulash".
Me shumë respekt dhe mirënjohje.
Eshref Ymeri
Kolumbus, Ohajo
14 janar 2017