Nga Prof.Dr.sc.Eshref Ymeri
Fort i nderuar dhe i respektuar inxhinier Fatosi,
Ju falënderoj nga zemra për përkrahjen që na jepni në faqet e internetit mua dhe intelektualit të shquar erudit, Prof.dr. Vedat Shehut, në mbrojtje të Çështjes Kombëtare Shqiptare. Ju keni shumë të drejtë, i nderuar inxhinier. 100-vjetori i shpalljes së Pavarësisë, ishte rasti më ideal që klasa politike shqiptare ta ngrinte më këmbë mbarë popullin shqiptar në krejt trojet tona etnike, për të kërkuar thirrjen e Konferencës Londra 2, me qëllim që të hidheshin poshtë vendimet kriminale të Konferencës Londra 1, e cila, nën presionin e fuqishëm të Rusisë, armikes së betuar të etnisë shqiptare, sidomos që prej Kongresit të Berlinit dhe deri në ditët e sotme, na i bëri çarçaf trojet tona etnike, duke majmur me to epshet shoviniste të grekosllavizmit.
Por klasa politike shqiptare e hapësirës Tiranë-Prishtinë-Shkup është mercenare e grekosllavizmit dhe e Brukselit. Prandaj edhe Çështjes Çame i është vënë përsipër një gur i rëndë. Në gjurmët e mercenarizmit të klasës politike të lartpërmendur, vazhdojnë të ecin intelektualët shqiptarë, me përjashtime shumë të rralla, dhe sidomos moderatorët e kanaleve televizive, të cilët, as edhe një herë të vetme, nuk organizuan një emision të posaçëm për Çështjen e Ribashkimit të Trojeve Etnike Shqiptare, që nga Preveza deri në Tivar dhe Shkup e Preshevë. Kjo, i dashur inxhinier Fatosi, është një fatkeqësi e rëndë për mbarë kombin shqiptar.
Me shumë mirënjohje dhe respekt.
Eshref Ymeri
Tiranë, 22 korrik 2014