Jeni në dilemë se cili parfum ju përfaqëson më mirë? Ja disa këshilla që do t’ju ndihmojnë
Aroma
Dëshironi të shkoni diku dhe të gjithë ta kuptojnë se jeni aty, pa pasur nevojën të thoni asnjë fjalë? Kërkoni të impresiononi ndonjë person të veçantë për ju? A nuk do të ishte e mrekullueshme sikur aroma juaj të mbetej tek të tjerët edhe pasi ishit larguar?
Nëse jeni lodhur duke eksperimentuar me parfume të ndryshme dhe akoma nuk e keni gjetur atë që do t`ju përfaqësojë në punë, në mbrëmjet me miqtë, në takime dhe kudo tjetër, ndiqni këshillat e mëposhtme.
Udhëhiquni nga personaliteti
Parfumi është aroma që ka brenda të shkrirë të gjithë qenien tuaj. Ndaj njerëzit që janë paksa të turpshëm, zgjedhin një aromë më të lehtë, ndërsa ata që janë shumë të vendosur mund të përqafojnë një aromë të fortë. Për më tepër parfumi duhet t`ju bëjë të ndiheni mirë dhe t`ju japë ndjesinë e rehatisë.
Ndiqni shijen
Nëse ju pëlqen vanilja, gardenia apo trëndafili, atëherë mos e lini pas dore këtë pëlqim. Përkundrazi, përdoreni atë për t’ju ndihmuar të zgjidhni parfumin tuaj të preferuar. Kërkoni aroma që afrojnë me shijet e mësipërme ose të tjera që ju pëlqejnë. Kërkoni disa lloje parfumesh dhe më pas zgjidhni atë që mendoni se i afrohet më shumë kërkesës suaj. Gjithashtu mund të kërkoni edhe mendimin e të tjerëve që i kanë përdorur ato lloje parfumesh.
Eksperimentoni
Mos u nxitoni në zgjedhjen e parfumit të preferuar. Mund të merrni dy nga aromat që ju pëlqejnë më shumë dhe t’i provoni për një javë secilën. Më pas kushtojini vëmendje reagimit të të tjerëve kundrejt atij parfumi ose mënyrës sesi ndiheni kur e keni spërkatur në trup. Nëse merrni komplimente për aromën, atëherë kjo është një shenjë që e keni gjetur atë që po kërkoni.
Frymëzohuni nga moda
Hidhuni një sy trendeve të parfumeve si klasikë ashtu edhe atyre më të fundit. Nëse jeni njeri që i pëlqen e shkuara, sipas shprehjes amerikane ‘old is gold’ (e vjetra është flori), mund të provoni shije që tashmë e kanë bërë famën e tyre. Informacioni i marrë nga moda mund t’ju frymëzojë shumë për të gjetur stilin tuaj. Mund të kërkoni edhe për parfumet që mbajnë njerëzit e famshëm ose ato që preferojnë stilistët.
Zgjeroni shijet
Të zgjedhësh një parfum të vetëm mund të mos jetë një ide e mirë. Gama e parfumeve është e gjerë dhe aromat nga më të ndryshmet. Përse të kufizoheni vetëm në një? Duhet të kini parasysh edhe faktin se do ta përdorni në situata të ndryshme dhe densiteti i parfumit është i ndryshëm gjatë ditës. Mbani disa parfume që nuk kanë asgjë të përbashkët mes tyre dhe përcaktoni kohën ose rastin se kur mund ta përdorni secilin.
Frutat dhe parfumi
Parfumet më të suksesshme janë ato që mbajnë aromat e frutave. Për këtë arsye ndiqni pëlqimin e frutës tuaj të preferuar për të përzgjedhur parfumin që do të bëhet firma juaj e padukshme. Nëse ju pëlqen portokalli, luleshtrydhja, qershia, molla dhe shumë të tjera, thjesht kërkoni për një parfum të ngjashëm.
Mos u ndikoni nga çmimi
E mira kushton. Mos lejoni që fatura t’ju largojë nga parfumi i jetës suaj. Zakonisht parfumet kanë çmime të shtrenjta, sepse përgatitja e tyre është një proces i gjatë. Duke pasur parasysh që aroma është një karakteristikë që do t’ju ndjekë kudo, mos e mendoni gjatë çmimin.
Kujdes me përzierjet
Përpiquni të mos i përzieni aromat në trup. Nëse përdorni një antidjersë të fortë, një krem për fytyrën ose një solucion për rrobat dhe pastaj vini edhe parfum, mos prisni asgjë të mirë nga vetja. Ruajuni nga kjo përzierje duke përdorur aroma minimale për secilin rast, në mënyrë që t’i jepni prioritet parfumit.
Ku ta aplikoni
Vendet më të mira për të aplikuar parfumin janë qendra e qafës, pjesa e prapme e veshit dhe e gjurit dhe pjesa e brendshme e kyçit të dorës.
Sekreti i jetëgjatësisë
Në mënyrë që parfumi të qëndrojë sa më gjatë në lëkurën tuaj, mbani parasysh se është mirë të fërkoni pak vazelinë në vendin ku vendosni parfumin. Mund edhe ta vini parfumin menjëherë pasi keni bërë një dush, duke siguruar kështu që ai do të rrijë gjatë me ju.
Kujdes me sasinë
Parfumi është i këndshëm, por çdo gjë e tepruar lë shije jo të mirë. Për këtë arsye tregoni kujdes me sasinë që aplikoni mbi lëkurë. Gjeni të mesmen e artë dhe lërini të tjerët të kuptojnë se jeni aty, pa thënë as edhe një fjalë të vetme.
.jpg)