Zbulohet skandali i rëndë i produkteve kozmetike që prodhonin sëmundjen
e tmerrshme të lëkurës. Këtë radhë, mashtrimi që ka tronditur
Ballkanin, e kishte burimin në Veria të Greqisë, ku një rrjet
ndërkombëtar i falsifikimit të produkteve kozmetike ka alarmuar
Gadishullin. Këtë radhë kontrabandistët dhe hajdutët ndërkombëtarë,
kanë rrezikuar edhe jetën e banorëve duke dëmtuar rëndë lëkurën e tyre
dhe duke shkaktuar sëmundje kronike të pashërueshme.
Njoftimi
Lajmi vjen nga mediat greke, ndërkohë që, hetimi pason Shqipërinë dhe
Kosovën. Sipas mediave greke, biznesmeni Arilaus Arvanikidhis nga Veria
arrestohet për kontrabandë të 25000 lloje produkteve të ndryshme,
kryesisht atyre të bukurisë. U sekuestruan 22 000 shishe me produkte
kozmetike të ambalazhuara si marka të njohura, të cilat i shiste edhe
në supermarketin e tij. Siç bëhet e ditur edhe nga vetë deponimi i tij,
destinacioni kryesor i këtyre produkteve të falsifikuara ishte
Shqipëria. Gjithashtu, atij i gjetën dhe 3 linja prodhimi të
ambalazhimit si dhe lëndë të parë në sasi të konsiderueshme të
produkteve kozmetike. Sipas mediave greke pas prodhimit, produktet
kozmetike ambalazhoheshin dhe etiketoheshin me marka të njohura. Më pas
tregu kryesor për këtë kontingjent produktesh kozmetike të falsifikuar
ishte Shqipëria. Por problemi i falsifikimit të produkteve kozmetike
vazhdon më tej. Kështu dhe në Kosovë janë konfiskuar kremra të
falsifikuar e pikërisht në Prishtinë dhe në Drenas. Kremrat e
konfiskuar prodhoheshin në Kosovë në mënyrë të jashtëligjshme, duke
shfrytëzuar emrat e preparateve të një kompanie maqedonase. Kjo
shpjegon edhe bllokimin e një sasie të konsiderueshme të produkteve
kozmetike nga Qendra Kombëtare e Kontrollit të Barnave. Kështu pas
denoncimit të një qendre private kozmetike pranë Qendrës Kombëtare të
Kontrollit të Barnave, kjo e fundit ka konstatuar disa produkte
kozmetike që tregtohen në farmaci si të falsifikuara dhe jashtë çdo
standardi përdorimi. Produktet e falsifikuara sipas drejtorit të QKB-së
mendohet të kenë hyrë nga vende fqinje. Drejtori i këtij institucioni,
Arif Shahini, është shprehur në media se janë disa produkte, si krem
kundër diellit dhe produkte të tjera kozmetike, të cilat tregtohen në
mënyrë të paligjshme në disa qytete të vendit dhe janë bllokuar nga
grupet e inspektimit dhe kontrollit të barnave. Por, ndër të tjera,
përbëjnë edhe rrezik për shëndetin, pasi janë të skaduara.
Zbulimi
Qendra e Kontrollit të Barnave fillimisht është vënë në dijeni nga
kompania franceze, që ka informuar në lidhje me dy produkte kozmetike,
të cilat kanë logo të njëjtë me produktet që ajo prodhon, por, sipas
analizave të kryera nga kjo kompani, rezultojnë të jenë të
falsifikuara, jashtë standardit të kërkuar dhe të dëmshme për
shëndetin. Menjëherë pas kësaj, Qendra e Barnave ka ngritur dy grupe
kontrolli në farmacitë e kryeqytetit për sekuestrimin e mallit të
identifikuar si i falsifikuar dhe kontrabandë. I njëjti urdhër është
lëshuar edhe për farmacitë e rretheve dhe sasia e produkteve të
falsifikuara është mjaft e konsiderueshme. Drejtori i këtij
institucioni, Arif Shahini, ka deklaruar për mediat se mbi prodhimet
nuk mund të kryhen analiza pasi nuk hyjnë në kategorinë e barnave,
ndërsa po punohet për burimin e tyre, pasi vijnë nga jashtë vendit.
Deri më tani nga kontrollet e ushtruara, 20 deri në 30 për qind e
farmacive tregtojnë këto produkte të rrezikshme kozmetike. Për këto
artikuj të falsifikuar në Drejtorinë e Policisë Tiranë është
regjistruar një procedim penal. Sektori i krimit ekonomik ka nisur
hetimet për veprat penale të falsifikimit të vulave ose stampave dhe
kontrabandës me mallra të licencuara. Nisja e hetimeve është kërkuar
nga Qendra Kombëtare e Kontrollit të Barnave pas kërkesës së kompanisë
së licencuar për prodhimin e produkteve dermatologjike. Më 20 maj të
këtij viti, është regjistruar procedimi penal, pa autor në Policinë e
Tiranës, duke pasqyruar të gjithë problematikën. Ndër të tjera, në
shkresën e dorëzuar pranë policisë janë dhënë të gjitha gjeneralitetet
e produkteve të falsifikuara, emri i kompanisë origjinale, numri i
kontaktit të subjektit tregtar që dyshohet se ka falsifikuar kremrat e
diellit dhe produktin tjetër.
Superfalsifikimi
Në paketimin e dy artikujve të falsifikuar, është dhe një njoftim për
“super ofertë”, për tregtimin e disa produkteve kozmetike. Gjithashtu,
në reklamë është dhënë edhe numri i kontaktit të subjektit që ka
falsifikuar produktet e kompanisë së licencuar, i cili kishte si qëllim
që të furnizonte subjektet tregtare apo konsumatorin. Dëshmitë e
farmacistëve do të orientojnë grupin hetimor në identifikimin e
personave që dyshohet se kanë falsifikuar produkte të një kompanie të
licencuar. Ndërkohë mjekët dermatologë tërheqin vëmendjen për rrezikun
që i shkaktojnë lëkurës produktet e falsifikuara kozmetike. Këto
produkte mund të shkaktojnë reaksione alergjike, infeksione të ndryshme
në trupin e njeriut. Dermatologët kujtojnë se sëmundjet e lëkurës, të
cilat nuk parandalohen që në fillim mund të bëhen shkak i çrregullimeve
më të mëdha në të ardhmen.
Kompania Kozmetike “PIERRE FABRE Dermo-Cosmetique” ka informuar në
lidhje me dy produkte kozmetike që kanë logon e njëjtë me produktet e
EAU THERMALE AVENE, por që rezultojnë sipas analizave të kryera nga
Kompania në fjalë, të jenë të falsifikuara, jashtë standardit të
kërkuar dhe të dëmshme për shëndetin. Produktet kozmetike për të cilat
bëhet fjalë janë:
0 – Very High Protection Cream SPF 50 – batch AV1120-exp: 03/16 (AVENIE
Crème Tres Haute Protection “SPF 50”).
- Ultra High Protection Cream SPF 50+ – batch is illegibile on
photographs-exp: 20160118 (AVENE SOALIRE Creme Ultra Haute Protection
“SPF 50+”).
Mjekët dermatologë tërheqin vëmendjen për rrezikun që i shkaktojnë
lëkurës produktet e falsifikuara kozmetike.
Këto produkte mund të shkaktojnë reaksione alergjike, infeksione të
ndryshme në trupin e njeriut. Dermatologët kujtojnë se sëmundjet e
lëkurës, të cilat nuk parandalohen që në fillim mund të bëhen shkak i
çrregullimeve më të mëdha në të ardhmen./gazetatelegraf