Tema TV ka siguruar pamjet e një dite të ethshme takimesh në hotel Rogner të kryetarit të LSI-së, Ilir Meta. Ai ishte ulur në barin që ndodhet në pjesën e prapme të hotelit të njohur në kryeqytet, për t’i qëndruar larg syve kureshtarë.Por nuk ja ka dalë t’i “shpëtojë” vëzhgimit të kamerës së Tema TV.
Meta ishte ulur së pari me biznesmenin e njohur Zamir Mane.
Por biseda e tyre e qetë, është ndërprerë nga mbërritja në Rogner e ambasadorit të BE-së, Ettore Sequi. Ky i fundit ka ndërruar rrugë kur ka parë se Meta ishte ulur në barin e lokalit dhe ju drejtua menjëherë tavolinës së tij. Në sallën më tej priste ministri i Brendshëm Flamur Noka, për një aktivitet publik.
Biseda mes Metës dhe Sequit është zhvilluar në këmbë dhe ra në sy fakti se ai që fliste më tepër ishte diplomati i BE-së, ndërsa kreu i LSI-së dëgjonte në heshtje.
Pak metra më tutje, në tavolinën ngjitur ishin ulur ambasadori amerikan në Tiranë, Alexandër Arvizu dhe ambasadorja e Gjermanisë në Shqipëri, Karola Holtkemper.
Pasi kanë dështuar të bindin kryeministrin Berisha të hiqte dorë nga akti i shkarkimit njëanshëm të anëtarit të LSI-së në KQZ, diplomatët ndërkombëtarë nuk duken të “dorëzuar” për të zgjidhur çështjen e krizës së thellë politike.
Ndërkohë kryeministri Sali Berisha nuk ka komentuar fare çështjen e KQZ-së në takimet e tij elektorale.