Dy vite burg oficerit për ‘arinjtë e demokracisë” (VIDEO)

Një gjykatë në Bjellorusi vendosi të dënojë me dy vite burg një oficer të rojës kufitare, pasi nuk arriti të ndalojë një aeroplan, që të hidhte qindra arinj prej pellushi, që kishin me vete mesazhe pro- demokracisë.
Sipas BBC, Gjykata Supreme tha se oficeri do e vuajë dënimin në një burg të sigurisë së lartë.
Emri dhe grada e tij nuk janë zbuluar.
Presidenti Aleksandër Lukashenko pushoi edhe dy gjeneralë pas këtij fluturimi, të organizuar nga një firmë reklamash suedeze.
Ngjarja ndodhi korrikun e shkuar.
Aeroplani i vogël me suedezë në bord, hyri në hapësirën ajrore nga Lituania, hodhi qindra arinj nga një lartësi e ulët në qendër të qytetit Ivyanets dhe u kthye në Lituani pa u shqetësuar nga ushtria bjelloruse.
Kjo ngjarje provokoi edhe një incident diplomatik, pasi Bjellorusia largoi diplomatët suedezë dhe tërhoqi stafin e ambasadës nga Suedia.
Firma e reklamave Studio Total tha se ishte frymëzuar nga aktivistët pro- demokracisë në Bjellorusi, që mbanin arushë prej pellushi në protestat e tyre.