Në kuadër të manifestimeve për 100-vjetorin e shtetit shqiptar, Ministria e Diasporës, në bashkëpunim me Unionin e Shkrimtarëve dhe të Kritikëve Shqiptarë, do ta organizojë aktivitetin “Takime letrare me bashkatdhetarët tanë në diasporë”.
Në konferencën për media, nga ana e drejtorit tët Departamentit për Politika të Diasporës në MeD, Musafë Xhemaili, kryetarit të Unionit të Shkrimtarëve dhe të Kritikëve Shqiptarë, Reshat Sahitaj, dhe poetit Gani Xhafolli, u bë prezantimi i aktivitetit “Takime letrare me bashkatdhetarët tanë në diasporë”.
Me këtë rast, z. Xhemaili theksoi se në kuadër të projektit “Takime letrare me bashkatdhetarët tanë në diasporë”, në bashkëpunim me Unionin e Shkrimtarëve dhe të Kritikëve Shqiptarë, do të mbahen orë letrare në mesin e mërgimtarëve. Këto orë letrare kanë për qëllim të dërgojnë mesazhe letrare te mërgimtarët, duke parë mundësinë e krijimit të kontakteve direkte, që të zhvillohet më mirë fjala artistike në diasporë, që mërgimtarët tanë të afrohen sa më shumë me vendlindjen.
“Ky projekt ka qenë i menduar bashkë me poetin Ali Podrimja, dhe tashmë, pas vdekjes se tij, e mbajmë këtë manifestim edhe në kujtim të tij. Në kuadër të takimeve letrare me bashkatdhetarët në diasporë, në këtë aktivitet, që do të zhvillohet brenda 10 ditëve, do të jenë të pranishëm krijues nga Kosova, Shqipëria, Presheva, Maqedonia, Mali i Zi, si dhe krijues që veprojnë dhe jetojnë në diasporë”, theksoi ndër të tjera z. Xhemaili.
Ndërkaq, Reshat Sahitaj e falënderoi Ministrinë e Diasporës, në veçanti ministrin Ibrahim Makolli, për vullnetin që ka treguar për përkrahjen e këtij aktiviteti.
“Qëllimi i këtyre orëve letrare, që fillojnë nga Brukseli dhe përfundojnë në Milano, është t’i takojmë mërgimtarët dhe të krijojmë kontakte me krijuesit evropianë; që para tyre të shpalosim kulturën tonë, letërsinë tonë, duke besuar që letërsia jonë nuk është e mbyllur, nuk është lokale, por në vete ka vlera që krahasohen me ato të gjithë Evropës”, tha Sahitaj.
Ky aktivitet do të zhvillohet brenda 10 ditëve, ndërsa grupi i përbërë nga disa shkrimtarë do të mbajë orë letrare në disa shtete evropiane.
Në kuadër të takimeve letrare me bashkatdhetarë në diasporë do të jenë të pranishëm krijues nga Kosova, Shqipëria, Presheva, Maqedonia, Mali i Zi, si dhe krijues që veprojnë dhe jetojnë në diasporë.
Më poshtë e gjeni edhe agjendën dhe adresat ku do të mbahen aktivitetet: Agjenda dhe adresat e orëve letrare:
1. Bruksel: 2 nëntor 2012 – Salla ARTHIS Rue de Flandre 33-1000Brux, ora 17 - 19:00.
2. Paris: 3 nëntor 2012 – Salla Revenue de Esprit, ora 17 - 19:00.
3. Berlin: 6-7 nëntor 2012 – Salla e restorantit La Gondola, ora 17 – 19:00.
4. Heidelberg: 10 nëntor 2012 – Wilhemstrasse nr.107-69118-ziegelhause, ora 14 – 20:00.
5. Zyrih: 9 nëntor 2012 – Biblioteka e qytetit Pestaloci, ora 19:30 – 21:00.
6. Gjenevë: 11 nëntor 2012 – (nuk është caktuar akoma vendi) dhe
7. Milano: 12-13 nëntor 2012 – (nuk është caktuar akoma vendi).