Zonja e Parë amerikane, Mishell Obama ka mbajtur një fjalim emocional duke mbështetur bashkëshortin e saj për një mandat tjetër katër-vjeçar në Shtëpinë e Bardhë. Duke mbyllur natën e parë të konventës së Partisë Demokratike në Sharllotë të Karolinës Veriore, ajo e vlerësoi presidentin Barak Obama si një bashkëshort të devotshëm dhe baba të kujdesshëm në shtëpi.
Fjalimi
Ajo gjithashtu e përshkroi atë si një “njeri të cilit mund t’i besojmë” për ringjalljen e ekonomisë së dobët të vendit. “Unë e dua burrin tim edhe më shumë sesa para katër vjetësh, madje edhe më shumë sesa para 23 vjetësh kur u takuam për herë të parë. Më lejoni t’ju tregoj arsyen. Unë e dua për shkak se kurrë nuk harroi se si ia ka nisur. Unë e dua për shkak se mund t’i besojmë Barakut, se do ta bëjë atë që e thotë, edhe kur është vështirë – sidomos kur është vështirë”, u shpreh zonja Obama. Zonja e Parë tha se presidenti ishte frymëzuar nga vetë përvoja e tij, kur avokonte për ligjet që përfshijnë kujdesin shëndetësor, borxhin e studentëve dhe pagesat e drejta për femrat. “Barak di se çfarë do të thotë kur një familje gjendet në vështirësi. Ai e di se çfarë do të thotë kur dëshironi diçka më shumë për fëmijët tuaj dhe nipërit tuaj”. “Barak e njeh ëndrrën amerikane, sepse e ka jetuar atë. Ai dëshiron që secili në këtë vend- secili, ta ketë mundësinë e njëjtë, pa marrë parasysh se kush jemi ne, nga jemi, si dukemi, apo kënd e duam”, u shpreh zonja Obama.
“Barack e di se çfarë është ëndrra amerikane!”
Ai e ka jetuar vetë këtë ëndërr, tha më tej bashkëshortja e presidentit. Michelle Obama iu drejtua delegatëve me bindjen se vetëm të bashkuar dhe duke mbështetur Barack Obamën, do të ketë një botë më të mirë për fëmijët. Për këtë ajo e quajti bashkëshortin e saj si një njeri me karakter të fortë që pavarësisht postit, e ka bërë atë edhe më të mirë. “Sot, pas shumë betejash dhe fitoresh si dhe të shumë momenteve që e kanë vënë në provë bashkëshortin tim në aspekte që nuk i kisha përfytyruar më parë, unë jam bindur se të jesh president nuk e ndryshon karakterin e njeriut, por zbulon se cili është ai në të vërtetë”, tha ajo.
Sondazhet dhe delegatët
Presidenti amerikan Barak Obama është duke u sfiduar në zgjedhjet e 6 nëntorit nga Mit Romni, ish-guvernatori i Masaçusetsit, i cili pranoi nominimin e Partisë Republikane javën e kaluar. Sondazhet e fundit të opinionit tregojnë se Obama mban një epërsi të lehtë ndaj Romnit. Të martën, delegatët demokratë mbrojtën politikat e Obamës në fushën e ekonomisë, e cila po përballet me vështirësi. Prefekti i qytetit të San Antonios së Teksasit, Xhulian Kastro, tha se “katër vjet më parë, Amerika ishte në prag të depresionit”. Ndërsa sot, sipas tij, falë veprimeve të Obamës, janë krijuar 4 milionë e gjysmë vende te reja pune. Në Konventën Demokratike treditore Barak Obama dhe Xho Bajden formalisht do të ri-nominohen për kandidat për president dhe nënpresident të partisë.
Xho Bajden dhe Barak Obama
Obama dhe Bajden do t’i drejtohen Konventës të enjten më 6 shtator. Menjëherë pas hapjes së konventës, delegatët demokratë miratuan platformën politike, e cila kërkon taksa më të larta për amerikanët e pasur, derisa mbështet martesën mes personave të gjinisë së njëjtë dhe të drejtën e abortit. Në tekst, gjithashtu përfshihet zotimi për t’i dhënë fund përfshirjes amerikane në luftën afgane në vitin 2014 dhe pengimi i Iranit nga sigurimi i armëve bërthamore. Dokumenti përmban një deklaratë për “përkushtimin e palëkundur për sigurinë e Izraelit”, por mungojnë paragrafët, që në platformën e vitit 2008 të demokratëve, i referoheshin Jerusalemit si kryeqytet i Izraelit. Ndryshimet kanë shkaktuar kritika nga Romni, i cili denoncoi përmes një deklarate “refuzimin e turpshëm të Obamës që ta njohë Jerusalemin si kryeqytet të Izraelit