Piktori dhe arkitekti Maks Velo, në një rrëfim për GSH, shpjegon për herë të parë pse nuk flet për femrat në jetën e tij. “Kam pasur një eksperiencë të hidhur me gruan me të cilën u martova. Ja, për këtë,” thotë Velo.
“Ishte agjente e Sigurimit. E kam pasur dëshmitare në gjyq dhe e kam të vështirë të prek këtë temë, e kam të vështirë të flas, të paktën derisa të dalin dokumente, të cilat s’po i marr dot. Sepse edhe dokumentet nga arkivat nuk iu jepen të gjithëve, iu jepen disave. Dua më shumë të botoj dokumentet sesa të flas vetë. Edhe ato janë me rekomandime politike”.
Velo thotë se nuk e ka takuar më ish- bashkëshorten. “Madje kur e shoh nga larg ndryshoj trotuar,” thotë ai.
I pyetur se përse e bëri këtë dhe përse dëshmoi kundër tij, Velo thotë: “Është problem shumë i gjatë dhe s’dua t’i futem. Unë dua të nxjerr letrat që ato kanë çuar tek Nexhmije Hoxha, në Komitetin Qendror të Partisë. Duhet të botohen letrat e kur të botohen ato, s’ka më nevojë për shpjegime. Ato ishin nënë e bijë dhe ishin të dyja agjente të Sigurimit. Këtë gjë unë e mora vesh mbas martese. E ëma e saj kishte dënuar një këpucar. Kur e mora vesh u tmerrova, por e kisha marrë vesh vonë dhe kishte marrë fund çdo gjë. Kur u bëra gati të ndahesha, mu kundërvunë dhe bënë kundërveprimin. Është një nga tragjeditë e shumta të asaj kohe. Është problem delikat”.