Me rezultat prej 4-0, Zonja e Vjetër e ka mposhtur Romën në njërën nga ndeshjet që konsiderohej si më e vështira për Juventusin në garën për titullin e Serie A.Bianconerët e përfunduan takimin që në gjysmën e parë duke shënuar tri herë, ndërsa edhe një herë realizuan në fraksionin e dytë.
Ishte vetëm fillimi i ndeshjes (4’), kur Arturo Vidal pranoi një top nga Paolo De Ceglie dhe i çoi në këmbë tifozët në Juventus Stadium.
Menjëherë pas (8’), i njëjti lojtar e dyfishoi epërsinë pas asistimit të Mirko Vucinic duke e bërë të qartë se çfarë drejtimi do të merrte ndeshja.Edhe më keq për Romën u bë pas ndërhyrjes së Maarten Stekelenburg në Marchision, me ç’rast për vendasit u akordua penalti, ndërsa portieri mysafir u përjashtua me karton të kuq.
Portieri i porsainkuadruar, Gianluca Curci, mbrojti goditjen e Andrea Pirlos nga pika e bardhë, mirëpo mesfushori juventin reagoi menjëherë për ta dërguar topin në rrjet (29’).Në gjysmën e dytë, Vucinic e ndali topin për Claudio Marchision, i cili shënoi një gol të bukur (52’) dhe vendosi rezultatin përfundimtar.
Pas golit të katërt, bardhezinjtë e ulën tempin e lojës dhe vetëm sa e lëviznin topin nëpër fushë për të kaluar minutat, derisa Giallorossët thuajse munguan në këtë ndeshje.Me këtë fitore Juventusi shton diferencën për tri pikë kundrejt Milanit dhe mund të thuhet se e ka në dorë titullin e Italisë, megjithëse asgjë nuk ka përfunduar ende.