Ministrja e Integrimeve Evropiane,
Vlora Çitaku, u shpreh dje
se Kosova këtë vit pritet ta marrë
udhërrëfyesin për liberalizim
të vizave. Në një intervistë për
Radio Kosovën ajo shprehet se
përmbushja e kritereve të përcaktuara
në Raportin e Progresit të
vitit të kaluar mbeten sfidat kryesore
me të cilat do të ballafaqohet
kjo ministri këtë vit. Çitaku
thotë se procesi i integrimit të
Kosovës në radhët e Bashkimit
Evropian është sfidë edhe për
Brukselin, për shkak të rrethanave
politike. Ajo shprehet optimiste
se pas përmbushjes së kritereve
nga ana e institucioneve
të Kosovës, BE-ja do të ndryshojë
qëndrimin e saj karshi Kosovës.
Duke folur rreth marrjes së
Udhërrëfyesit për liberalizimin e
vizave, ministrja Çitaku,
ndonëse nuk saktëson ndonjë
afat konkret, thotë se kjo të
ndodhë shumë shpejt. „Unë jam
e bindur që Kosova do ta marr
shumë shpejt udhërrëfyesin dhe
kjo siguri nuk më vjen vetëm nga
fakti që tashmë ne kemi plotësuar
kriteret, por edhe nga vetë
deklarimet e nga zyrtarë në Bruksel,
të cilët kanë artikuluar qartë
në favor të dhënies së udhërrëfyesit
për Kosovën“, thotë Çitaku.
Zhvillimet e fundit në vendet
fqinje padyshim që prodhojnë
efekte negative edhe për Kosovën,
thotë ministrja Çitaku. Prandaj,
ajo mendon se politikat ndër rajonale
duhet të jenë më të dakorduara
njëra me tjetrën. „Shumë
prej sfidave të procesit të integrimit
janë të karakterit rajonal.
Korrupsioni, krimi i organizuar
janë shumë të lehtë të tejkalueshme
në rast se fuqizohet
bashkëpunimi rajonal dhe padyshim
që çfarëdo lloj trazire në
vendet përreth prodhon efekte
për tërë rajonin“, shtoi Çitaku.
Ndërsa, duke folur për sfidat
tjera të kësaj ministrie, Çitaku
përmend edhe zhbllokimin e
çështjes së CEFTA-s si dhe përmbushjen
e kritereve tjera të përmendura
në raportin e progresit
të vitit të kaluar, në mënyrë që
raporti i këtij viti të jetë më pozitiv,
thotë ajo.