TROKITJE TË HESHTURA
1-NJË NATË E QETËSIVE
Mendime endëse ...,
Shikime që gërryejnë shpirtin,
..., dhe zemrës mprehet drita e fjala .
Në shpatë projekton një histori dykuptimëshe ,
Mbas një pelerine të lehtë mjegulle,
Në jorganin e yjësisë kredhur në ëndërra dimërore !
2-QETËSIA
Qyteti qetësohet...,
Qetësia – mbretëron qetësia,
Qetësia – mbretëresha e heshtjes,
Qetësia – mbretëresha e rrahjeve të zemrës
Jam në dëgjim ...
Qetësia pushton edhe zemrën tënde
E tashmë – heshtje ...,
3-NË HESHTJE ME VETEN
Mendjes , hapet një zbrastësirë
Shtohet melankolia...,kur fiken dritat
Kremtja ka mbaruar ...,ndalet muzika
Askush pa e kuptuar
I ka hapur udhë ditës së fatit
Diellit të dashurisë !
4-MBETET
Castit , poezia humbet ndjenjës
Mbetet vetëm një enigmë në letër
...Kapërcyer mbetet për një cast
Aty, ku poezia përzihet me përditshmërinë
Mbetet vetëm ndjenja e dashurisë
...Është një çast
5-SËRISH ATJE ...
Mbetur memories gjatë
Më shfaqesh sot si bekim
...,dhe vazhdoj , eci për larg
Në këtë mision njerëzie
Shtrydhur me shpirt !
6-FLETËZA KOHE
N’ëndërrat e mia të kohës , mrekullia,
Fletëza mendimi hapen mbi pëllëmbën e fatit.
Dredhur në hije të një kënge
Kalvari i gjatë i pritjes kohë !
7-KUFIJËVE TË DASHURISË
S’ndalen shpirtrat ...,
Me ëndërra njerëzie ngrejnë kështjella
Me besnikëri veshur nga një det dashurie
Valleve të fatit vallëzojnë edhe përtej kufijëve të tyre !
8-PËRKUSHTIM BESËS !
Nisem rrugës së fatit me këngë dashurie ,
Stinë e botëra pushtoj , ngatërruar në udhëkryqe ,
Amshimit të besës mbetem përkushtim
Me krenari i këndoj edhe kësaj jete !
9-KLITHJE ZEMRASH
Si një përqafim gjethesh ,
U kurorëzuam në fronin e mrekullive
Nisëm të lumturuarën stinë
Në autostradën e pafundme
Të klithjeve të zemrave !
10-NË PRAGUN E DASHURISË
Kapur në vallen e mrekullive
Përqafuar në pëllëmbë të fatit
Shkelim pragjeve ku fle heshtja
Të hyjmë në derën e madhe të dashurisë
Për të mbetur brënda deri në amshim !
11-VITET E DHEMBJES
Në xhep të palltos kam fshehur dimrin
Ishte nxehtë...,
Lulëzonin bashkë me të pasiguritë
E të vërtetat mbeteshin të tkurrura ...,
Të mbyllura në një dollap mendimesh !
Pas kohësh se gjeta më , kur doja të nxehesha
I kisha xhepat e shpuar nga vitet e dhembjes !
12-MBËSHTJELLË ME DASHURINË
Në një lakore dashurie
Mbështjell dashurinë tënde
Të kthej kah unë
Dhe merr frymë lirisht
-Është i yni
Shekulli i dashurisë.
13-MENDIMI MË I ËMBËL
Të shkoj të fle . . . ,
Është mendimi më i ëmbël
Të rifilloj nga ëndërrat
Për t’ia nisur nga zero
E për të mbërritur në fronin e dashurisë !
14-NJË PIKË REALITETI
Diçka po lëvizë . . . , më ftohtë se bora,
Dashuroj e dashuroj, në frymë të jetës,
E ngelem në thikë të ëndrrave .
Këndshëm, shoh ku njerëzit,
Për interese pa interese ,
japin e marrin dashuri... !
15-STINËT E DHEMBJES
Kanë rënë shumë lisa
Bashkë me stinët e dhembjes
Tradita janë përzier . . . ,
..., dhe shekujve gjurmë-gjurmë ,
Mbeten tragjedi të ndrydhura !
16-ATJE NA PRET BEKIMI I DASHURISË
O mbretëresha e fronit të fatit
Do të shkojmë bashkë në një rrugëtim
Skalitur me ngjyrat më të bukura
Me më t’ëmbëlat rreze , do na e jap atë bekimin.
Shenjtëresha e trojeve tona, fuqia e përjetësisë ,
Ajo që futi në zemër botën, e ëmbëla Gonxhe e Dardanisë
Të gjitha racat njerëzore e lumtura ti’ Nënë Terezë
Atje na pret bekimi yt i dashurisë !
17-N’ATO HAPSIRA
Në stinë të ndryshme janë derdhur shumë lotë
Viteve ndër shekuj kam qarë për vuajtjen time
Kam luajtur me të qarën dhe të qeshurën
Atje ka gufuar shenjtëria në mes fëmijëve
Atje është shkruar dhe shkruhet historia
Atje ..., ku jetën e qëndis dashuria .
18-CAST
Një ëndërr e trembur fshihet
Me një realitet të vrazhdë përzier
Për një dashuri që të rrënqeth
Mbase të papritur..., e tëra kjo !
19-NË LITAR TË FATIT
Të mbetur varur , në litarin e fatit
Mprehin dhëmbët nën qiellin e interesave
Të pritura dhe të papritura veshur me padrejtësi
Pret apo nuk pret ..., çdo gjë ndodh sot.
Ne këpusim orët të shtyjmë kohën !
20-NË SHKËNDIJAT E DASHURISË
Shpirtërat tanë janë më të fortë
Mes lumturisë shpërthejnë sythe zemre
Edhe në këtë të pestën stinë...,
Zëra të ngrohtë n’a vijnë nga larg
Të jemi prijës të parë
Në të gjitha rrugët e njerëzisë .
21-STINA E VYSHKUR
Në mëngjesin e parë të lumturisë
U zgjova me fuqi mrekullie
E përplasa në të kaluarën stinën e vyshkur
Sot ndjehem i lumtur nën kurorën mbretërore
..., dhe krenar , në fron dashurie !
22-KRAHËT E ENGJËLLIT
Krahë për të fluturuar ,
Krahë për të qenë i lirë ,
Rreth meje mbështillen dëshira, të prekin qiellin ,
Kaltërsive të pafundme , arrij të kapem me retë .
Janë krahët e ënrrave të dikurshme
Krahët që prekin qiellit një tjetër jetë të padukshme !
23-N’AGUN E PARË
Në perëndim të diellit
Hëna i kthehej të vakët
Besnike e një qielli, mbështjellë prej yjësisë
Si dashuria mbret në të përjetëshmen jetë !
24-BORA
Zbret ngadalë
Mbi kulmet e shtëpive
Zbardhëllon dhe lodh gjithçka
Bora. . . ,
Bardhësia e ftohtë ??????????
Qetësohet mahive të çative
E mbi livadhe të pafundme
Diku...,gëzon nga pak zemrat e dashuruara
25-NJOHJE ME VITET
Trokitjet e para shkuan si vajtimi
Një rrahjet e tanishme, trokitja më ngjan me ty .
Më ngjan me dashurinë që kryqëzohet kaq larg
...dhe ëndrrave vrapoj te kap, por është e kotë
Në këtë hapësirë që quhet vec heshtje . . . ,
Ndiej kordelet e mallit që la njohja e viteve !
26-TI
Bukurinë tënde se kam krijuar unë
As dashurinë që më jep çdo çast
Në stolin e ndjenjës puthjet nisin udhën
Ti ndodhesh kudo , …, dhe mes zërit të erës !
27-KUR TË MERR ABSURDI
Një zbrazëtirë që të gllabëron ,
Nuk ka asgjë që të ngushëllon ,
Vetëm rrugët në mendjen tënde
Bëjnë ecejake në vështrim të një nate të gjatë.
Frigohesh mos po harron të marrësh frymë ,
Sheh përtej , njerëz që të duken të lumtur
Duken…, në të pëtypur mendime…,
Një zbrazëtirë e pa kuptueshme , kur të merr absurdi !
28-ÇASTE TË VËSHTIRA
Vështirë ia dal t’i duroj dhembjet
Mendime të turbullta
Shthurje ideshë
29-PO PRES ...
Mbyll dhe hap sytë e mi
Të çuditshme si trillimet
Vijnë hijet e mendimet
Dua të të shoh në pritje
...,por dukem i verbuar nga drita e fortë
Duhet të vijnë me faktet e së vërtetës
Të më shpëtojnë, dua të të shoh ...,
30-DIÇKA E ÇUDITSHME
Si ka mundur të ndodh me mua
Kam bërë gabimet e mia
Nuk di ku të vrapoj
Nata po shkon siç po shkrihem unë
Mbase jam i lodhur nga kjo jetë
Dua vetëm të ulëras në pragjet e dhembjes !
31-DUHET TË NDRYSHOJ
Të gjithë më presin ...,nuk di ç’të bëj, eci ...,
Kapërcej të hidhem në një jetë të re
Dua të bëj një hap përpara
Jam i lodhur me jetën time të vjetër
Është koha të ndryshoj
Të mbërrij horizonteve të reja
E nëse gjithçka do të riderdhet
Do të rritem me kohën duke jetuar jetën e re !
32-NË VALËT E DASHURISË
Shoh një mbretëreshë të bukur
Vdekja buzëqeshë mbrapa fytyrës së saj
Më fton me verë te shkoj tek ajo
Jam trullosur e dalldisur
Rrezikohem me përkëdheljet e saj
Përse nuk je larg shpirtit tim, tunduese
I ndezur nga dëshirat e mia më t’errëtat
I verbër do e shohësh ende flakën tënde
33- FATI I AMSHUAR
Shoh të bukurin fat
Në qiejtë arbërorë
Më fton me buzëqeshjet e saj
Zemra ime don të bëhet bashkëpunëtore e saj
Rrahë fort për mrekullitë e dashurisë
-Në regjimin tonë
Fati e dashuria
Sundofshin deri në amshim!
34-VËSHTIRË ...
Shoh një të vuajtur përballë teje
Rrethon vdekjen mes krahësh
Zemra ime përgjakë mes shuplakave të saj
Jam i dobësuar e i dërmuar .
35-ARMIKU ...
E shoh të heshtur, të egër
Rikujtoj jetën time...,
Një jetë e dhembjeve, e luftimeve
Armiku vjen drejt meje
Është koha të luftohet për veten...,
Ishte koha që luftohej për vdekje
Unë nuk luaj , qëndroj për vendin tim
Për ëndrrën time të lirisë, dergjem në sytë e fjalës , amshim !
36-DUA TË JEM SI TI
Engjëll blu qiellor
Jam duke të pritur shumë kohë
Eja të më marrësh
Më bën të shoh gjëra kurrë të papara
Më bën të lumtur për herë të fundit
M’i jep krahët tu
Një engjëll blu qiellor në mbretërinë tokësore
Të jem si ti dhe në mbretërinë qiellore !
37-MË LIRO
Kafshimi yt i zjarrtë
Më ka mbyllur në një hendek
Tashmë më ka përlarë tymi...,
Mendime mbi mendime më vijnë në mendje
Provoj t’i fshij e t’i largoj një nga një
E vendi s’ngelet bosh nga të tjera që zënë vend
Unë nuk ia dal të lirohem , kam nevojë për dritë
Kjo është zgjidhje , drita jote më ndihmon
Liromë nga mundimi im e më bën të lirë !
38-ENDE TË DUA !
E gjithë kjo nuk ka kuptim
-Mendoj për ty në çdo çast të jetës sime
Ti je gjithçka për mua
Më bën të ndjehem i fortë
Por në të njëjtën kohë edhe i plogshtë
Je e vetmja që të kam dëshiruar shumë
..., ehh, mbase ty të pëlqen një tjetër
Kjo më trishton ..., jam për ty këtu
E pamundur të të harroj ...,
Më ke shpalosur një pjesë timen që s’e njihja
Më ke dhuruar dëshprim
..., por dhe gëzim , Po – gëzimin që të kam njohur.
Nuk di ç’të bëj pa ty,
Lamtumira është kurthi i dhembjes
Dhembje-dashurisë, që ende të dua !
39-DHEMBJA
Luan me zemrat tona të ligështa
...provon kënaqësi në krijimin e lotit
Në dhurimin e çasteve jetëshkurtëra të gëzimit
Përcjellë nga ditë të thella të trishtimit
Dhembja ...,
Shoku i tij besnik
Na mbështjell në pelerinën e tij të ngrirë
40-NDODHI
Heshtja nuk bën zhurmë ...,
Një puthje vringëllon jo vetëm duke të trajtuar
Askush s’i ka dëgjuar mundimet e dhembjeve të tua
Është si shqelmimi i një fëmije që takon jetën
Nuk kam vendosur t’i shtyj malet
Unë do të rritem, si jam rritur...,
Çerdhja e kërrusur e një trungu shmanget
Qëndron në shartimet e kalbura të kohës
Nuk ka zjarr të dendur që nuk djeg shpejt
Këto vite –jete , mbetur më të shenjtat.
Nuk ndjejnë ditët që bien në shpejtësi
Shkëputje të dridhura, dikur të gjelbërta!
41-KAM FRIKË ...
Dhembja më brengos
Tashmë ndjej vetëm dhembje
Ndjenjat që më takonin njëherë
Janë shkrirë si hiçi
Tash kam të ftohtë
...Ç’do të më ndodhë ende?
Pse e gjithë kjo?
Pse mua?
Kam frikë
Kam nevojë për një dorë të zgjatet
Të më zgjojë nga dhembja ime
Dua të ringrihem drejt lartësisë
42-DASHURIA ME TY
Dashuria me ty , m’a bën të lumtur zemrën,
Si një lojë e luajtur dikur..., në fëmijëri.
Dashuria me ty , pranverën e sjell më shpejt,
Valë lumturie , si deti i përkëdhelur nga rrezet.
Lule e çelur që nuk të vyshkin stinët !
43-LUMTURI
Lumturi është të të përqafoj fort
Ëmbëlsisht të të puth , derisa të fle
Për të të zgjuar ngadalë
..., e pastaj për të ndezur pasionet !
Në befasi për të të zbuluar çdo ditë
Më bukur , gëzimi e gjërave të vogla
..., dhe të të dëgjoj derisa më pëshpëritje në vesh
Të ndjej ëmbëlsinë e përkëdheljeve tua !
44-TI JE BRENDA MEJE !
Sa herë që shikoj yjësinë mendoj për ty,
Kur shoh të çelë një lule të ndjej brenda meje,
Çdo herë që shikoj qiellin shpirti im zhytet reve,
Nuk gjej fjalë për të të thënë ato momente.
Më ikin nga mendja, hutohem…, thjeshtë se të dua !
45-DY VARGJE PËR TY !
Dua të thur dy vargje të thjeshta ,
Të bukur e delikate, siç të kanë hije ty mike.
E pas vitesh ti lexoj , ti kthej ato vargje ,
Në prehër të zemrës , t’i shtroj ngadalë
Qëndisur nga shpirti im me fjalët-margaritar
Dashuria ime e vogël e madhe lumturi !
46-I LUMTURUAR NË ZEMËR
Goditje brenda shpirtit
E dashura ime e zemrës-dashuri.
Të parën herë kur të kam parë
Kam ndjerë shpirtit goditjen e vetëtimës
..., dhe një gjëmim .
Fytyra jote ngeli brenda meje portret
Ditët shtyjnë ditët e unë s’të kam harruar nga ai mëngjes!
47- HESHTUR ME VETMINË
Në vetminë e zemrës sime ,nuk kalojnë orët
Buzët e mia janë vetëm , nuk më vijnë fjalët
Vetëm një mendim pushton mendjen time
Ngadalëshëm më vjen, mendimi që të dua!
48-NË HESHTJE
...dhe në heshtje po më rrëmben malli ,
Fuqishëm ia ndiej lotet qe çurkojnë mbi letër.
Dashuria ka kohë që vlon në zemër .
49-SHIGJETË DASHURIE
Sytë e tu dhe buzëqeshja jote
Për mua janë rrugët e shpirtit
Shikimi yt ,më tret lotin e ngrirë,
Drejt amshimit të dashurisë!
Brishtësia e trupit tënd zemrës sime
Shigjetë e pastër dashurie !
50-SHPRESAT JETOJNË
Vitet kalojnë e shpresa rritet brenda nesh
Shpresa merr udhët e saj në sytë tanë
Së shpejt do të kthehemi në trojet ilire
Do të jemi të lumtur atje në tokën e etërve
Shpresa jeton shpirtit ...,e ne jetojmë me shpresë !
51-TË DUA , JETË
Të dua përkrah në të lindur të diellit
Në të zitë e errësirave më të dendura
Në qiejt e pastër të qartësive të mia
Të dua dashuri për të të përkëdhelur
Fytyrën tënde t’ëmbël e të dashur !
Të dua gëzimi im për të ta përkundur zemrën
Ti je emocioni im ,je ndjenja e zemrës sime
Je çmenduria ime, dua të të kem pranë !
Qenësia e Unit tim
Je jeta ime _ Dashuri !
52-SHEMBIM DHE MALLET...,
Edhe pse larg në dhe’ të huaj
Triumfon dashuria arbërore
Bashkë me traditat e shenjta
Me këngët e vallet që mot-moteve
Shembin malle që dergjen zemrave !
53-RRATHËVE TË KOHËS
Jemi përpëlitur shekujve duke luftuar me vdekjen
Kurrë s’e kemi harruar origjinalitetin ,as dashurinë
Ehh…,traditat tona , me interesa janë ndeshur...,
E mbi jetën kurrë nuk është shkelur ndershmëria !
-Rrathëve të kohës janë ruajtur vlerat njerëzore
Me shpirtin etnik të gdhendur në gurin e breznisë !
54-FJALËT !
Fjalët ...,
Rrëshqasin në mëkate, ndeshen interesave
Me to rrotullohemi dhe ne
Në lëmshin e parë pengohen mëritë
Në të dytin rrëzohen njohjet e vjetra
Në të tretin vdesin ..., të pathënat fjalë !
55-SHUMË NDRYSHIME
Në të gjitha botë t flasin interesat
Askush s’e njeh askënd..., në botën e çudirave
Pak njihet njerëzia ...,
Zemrat kanë harruar këngën
Dashuria është dhunuar mes interesave pa kuptim!
56-NE DHE JETA !
Unë edhe dashuria ime
Përcjellim lëvizjet tona vështrimeve
Ecim krenarë për të mësuar rrugën e sinqertë
Ecim ..., jemi në rrugë të drejtë të jetës
Botët ndajnë në heshtje mëritë e vjetra !
57-S’E NJOHIM ACARIN
Se njohim lotin që ngrin degëve
Mbështjellë në guackë të fatit
Unë dhe mbretëreha ime
Flemë mes dashurisë , nuk e njohim acarin !
58-NË KËTË SHEKULL TË RI
Nuk duam të jemi vetëm dëshmitarë
Historive të dashurisë , mrekulluar nga ndjenja
Unë këpus petale lulesh të virgjëra
Në këtë shekull të ri , ngjeshur nga vaje malli !
59-NË SHENJË TË BESIMIT
Me vuajtjen jemi bërë bashkëudhëtarë
E drejta nuk është kurrë me ne ...,
Mbërthyer nga e vërteta , ngjyrat ia shtrydhim historisë
Të jemi njerëz të besës në traditat e të parëve ,
Të jemi ata që s’mund të jemi !
60-EJANI ...,
Ejani të shihni ...,
Mbretëresha ime është ylli më i bukur
Bën të shkëlqejënë ditët e jetës ,
e kësaj yjësie pa skaj .
Gjithnjë sjell gëzim në zemrën time !
61-T’ARTAT GERMA
Kanë shkruar historinë time
Kanë qëndisur fatin tim me lule dashurie
Kanë mbushur shpirtin tim
Me t’ëmbëla kujtime .
62-KU JE ENGJËLLI IM
Të kërkoj ..., do të doja të të thërras me forcë
Ç’ditë e errët kjo pa ty, vetëm në trishtim
Kuptohem në vështrimet e tua dhe ndjehem tjetër
Vetëm ti m’i lexon sytë dhe më përcjellë në shikime
Aromën që më fundos në një vorbull pa kthim .
Të kërkoj ëngjëlli im , me zërin të më ulesh mbi krye
Do të bëhem i fortë për ty ...,
Të të kërkoj, -ku të gjej ?!
_thuam ëngjëlli im !
63-DHEMBJE DASHURIE
Do të doja ta njihja dhe ...,
Bashkë me ty , ta zbuloja dashurinë
Tash është vonë për mua
Zemra ime ka mbresa të viteve të shkuara
Ah!
Po të mundja do të doja të jem bashkë me ty
Kur zemra ime ka zbuluar ç’ishte dashuria
Kur trupi im ,ka zbuluar ç’ishte dëshira
Të isha me ty , të mësonim leksionet e dashurisë
Të bashkuar do të zbulonim fshehtësitë e jetës
Kam lejuar për një çast që zemra ime të ëndërronte
Nuk do të lejoj më që zemra ime të besohet
Nuk dëshiroj më të dashuroj ...,
Dashuria sjell vetëm dhembje !
64-TI ...
E humbur në dredhjet e ëmbëla të shpirtit tim
Edhe njëherë i heq merakun asaj ndjenje të shkretëruar
Që kalëron nga një kënd në tjetrin
Një përkëdhelje , një puthje , një përqafim
Ti që ke gjithnjë një fjalë ngushlluese
Ti që di të më bësh të jem mirë
Ti grua misterioze e bukur dhe magjepëse
Ke ditur të nxjerrësh jashtë , një pjesë timen të fshehur
Në të cilën asnjë tjetër nuk merr pjesë
Ti që je bërë për fronin e dashurisë
65-TROKITJE TË HESHTURA
Sillen rrotull , trokitje të ndryshkura ,
Trokitje të fshehura memories kohë.
Orët e tyre të mbetura në pasiguri ,
Varur rrinë në pikëpyetjen e jetës ...,
Janë ndryshkuar akrepat e asaj kohe
Kohës-torturë , shartuar nga heshtja !
66-E SHENJTË ORIGJINA !
Në origjinën tonë fle shpirti i pasur ,
Hapave që hedhim ,Dardania mbetet e shenjtë.
Përkulemi legjendës , si uji i burimit në zaje ,
Në faqet e Ilirisë shtrihen traditat , brezave .
67-STINËT E JETËS
Sa bukur kalojnë vitet , stinët e jetës,
Hyjnë e mbeten histories, ndershmëria dhe besa.
Me tradita fisnike , iliro-arbërore ,
Mbahem i fortë nga tallazet e kohërave,
Shenjtëruar që në djep të foshnjës nga të parët !
68-BOTA E INTERESIT
Botë e panjohur në sirtar të krimit ,
Mbjell veç lotë nga tragjeditë.
Botë e panjohur, nën trup të interesit ,
Mbytyr nga hijet e duarve të “përlyera”.
Botë që shembesh nën vete pa u ngritur ende ...,
69-ZËRA TË LARGËT
Ka kohë që zërat e tyre s’i ndiej më ,
Trupat lëvizin në dritë-hijen e rrezeve .
Ata duhet të ikin nga kjo stinë …,
Hetueshëm bien në mesnatën e thyer !
Radhë shkon njëra pas tjetrës koha e shkuar .
70-PËR NJË FJALË
Kam mbetur në heshtje …,
Për të vetmen dashuri-shpirti ,
…, që të jetë mbi çdo të dhënë falje-shpirti .
Ndiej dhe trokitjet e tastjerës së ftohtë
Për një fjalë prej teje …, një fjalë të vetme !
71-JETË NË VARGJE !
Unë dhe dashuria ime edhe pse të vuajtur ,
…, kapërcyem lume dertesh në jetë .
Përherë kemi qenë të palëkundshëm kohërave ,
Në të gjitha stinët e dashurisë …,
Bekuar nga shpresa , për të ecur vetëm përpara !
72-VESI PERVERS
Në vorbullën e interesave është ngritur muri i frikës ,
Muri që godet dhe të drejtën njeri në pabasi .
Sulmuar nga të gjitha anët , jemi strehuar larg ,
Larg fjalëve boshe të vestarëve – argatë .
…, dhe preim mrekullinë hyjnore për të na shpëtuar,
Me dorën e saj të shembim vesin pervers !
73-NË SHTEGËTIM ME TY
Në udhën e mbarë të të madhit Zot ,
Unë dhe dashuria ime shtegëtuam gjatë …,
Erdhëm …, erdhëm, të mbetemi pjesë e jetës,
Erdhëm të ngrejmë shtyllën e trashëgimisë , brezave.
Asnjëherë nuk i humbëm shpresat …,
ndjekur nga dashuria, në rrugëtimin e ndjenjës !
74-DIKUR …,
Dikur …,
Atëherë…, kohë e vite shkuar ,
Përherë shpirti i këndonte dashurisë.
Dikur…, atëherë edhe si sot
Deri në rënkime e lotë .
75-LOT ‘ I DHEMBJES
Erdha vetë unë ,
Të ta thaj atë lot mbi buzë ,
Ishte i pashtershëm…, nuk munda dot.
Lot i dhembjes, lot i heshtur ,
Pas një historie të shkruar shekujsh !
76-DHEMBSHURISË TOKË !
Unë ,
I kam lindur ,
.., e i kam rritur ,
Unë..,ata sot më sulmojnë .
Më djegin në njërën anë ,
N’anën tjetër më mbulojnë me ujë ,
Duan t’më shkatërrojnë mua dhe historinë .
77-MUNDOHEM…,
Mundohem të jetoj larg teje ,
Mundohem të bëj diçka tjetër .
Mundohem …, po nuk mundem,
Në derën e dashurisë ,
Nuk hyj dot pa ty
As larg teje , dashuria ime !
78-PËRSHTATEMI REALITETIT !
Ecën me mendimet tona ndërgjegjia ,
Zvarritet mes halleve që shkojnë ditëve.
Ne,besnikë deri në vdekje ,
kohës që jetojmë me kohën ,
Ata shkojnë…, kokën pas s’e kthejnë tek ne.
…, ne përshtatemi e vuajmë brezave ,
realitetin e hidhur që ngelet në derë.
79-JETA DHE VALËT
Kanë ikur njerëz përtej detit ,
Pabesi dhe tmerr mes të papriturave,
..,por kanë shpëtuar nga valët.
Sot janë më të fortë e të sigurtë,
Rrahur nga jeta e vitet shkuar !
80-NJERIU
Në kalime stinësh prekur me vitet ,
Janë vrarë shpirtëra në hije mendimesh .
Lidhur mot-moteve në dorë të besës ,
Klithmëra të ngujuara në stan të dashurisë.
Njeriu me kohërat shemb errësirën që përthyhet yjësisë.
Në të ikur…, meteorë mendimi mbeten galaktikës .
81-KARAKTERI NJERI!
Atje , kodrës që ngrenë interesat ,
Mos më kërko, nuk do të më gjesh kurrë ,
Dorës që zgjatet e nuk tronditet nga krimi ,
Mos më kërko, gropave të interesit …,
Nuk humbem udhëkryqeve të fjalëve boshe.
Karakteri më bën njeri , ndarë prej kësaj bote !
82-GJURMË MËKATESH...,
Mëkate memece,të rëna nga degë kombesh ,
Më të vetmuarat,se hija e një hëne mes resh,
Mëkate të shartuara me dorën e së drejtës.
Nisur , zvarrë, këmbë-zbathur, shkëmbenjëve,
Ndaheshin copë-copë me veten mëkatuar .
Engjëll Koliqi është i lindur më 10 nëntor 1956, në Stubëll të Vitisë në Kosovë. Shkollën fillore tetëvjeçare e ka mbaruar në vendlindje, gjimnazin – drejtimin e shkencave natyrore/matematikore në Viti dhe në Ferizaj. Në Universitetin e Kosovës në Prishtinë ka mbaruar fakultetin e edukimit dhe ka marrë titullin akademik: profesor i pedagogjisë.
Tetë vjet ka punuar në vendlindje, si mësimdhënës e edukator. I ndjekur nga regjimi okupues i Beogradit, pasi më parë edhe ishte arrestuar, në mars 1990 është detyruar të largohet nga vendlindja dhe shkon në Itali, ku edhe sot jeton e vepron me familjen e tij. Që nga fillimi ka punuar gazetar dhe redaktor në Radio Vatikan, korrespondent i radiotelevizionit shqiptar – RTSH në Tiranë e pastaj i radiotelevizionit të Kosovës – RTK në Prishtinë. Ka punuar edhe për radiotelevizionin publik të Maqedonisë, si dhe për radiotelevizione të tjera private në gjuhën shqipe. Mbi 20 vite shkruan në shtypin e përditshëm dhe atë periodik shqiptar – në Kosovë, në Shqipëri, në Maqedoni, në Mal të Zi dhe në diasporë. Më së shumti ka shkruar në gazetat: Rilindja, Bujku, Bota Sot, Lajm Ekskluzive, Pavarësia News, Koha Jonë, Rilindja Demokratike, Panorama, Shekulli etj. Ka bashkëpunuar edhe me gazetat italiane – Corriere della Sera, La Repubblica, Il Messaggero, La Stampa, Il Mattino, Resegone, L’Avvenire, Famiglia Cristiana etj. Poashtu ka bashkëpunuar edhe me dy qendrat kreyesore radiotelevizive italiane – RAI dhe MEDIASET
Mbi 30 vite është marrë me organizimin e shoqatave atdhetare, kulturore, artistike dhe humanitare. Në politikë nuk është angazhuar as aktivizuar në asnjë parti, edhepse bashkëpunon me të gjitha palët e politikës shqiptare, në Kosovë dhe në viset tjera shqiptare. Është i akredituar nga Qeveria e Kosovës, si gazetar dhe veprimtar në Itali.
Përveç artikujve gazetareskë dhe shkrimeve publicistike, ka botuar edhe qindëra poezi, nëpër gazeta e revista shqiptare. Në italisht ka botuar përmbledhjet me poezi “Il mio secolo si chiama amore” (Shekulli im quhet dashuri), si finalist i konkursit ndërkombëtar “Autorët për Europën 2005” , në Shtëpinë Botuese IBISKOS, në Empoli, si dhe përmbledhjen tjetër voluminoze, prej 161 poezishë, me titull “Sentimento di luce” (Ndjenjë drite), më 2007, nga Shtëpia Botuese BOOPEN, në Napoli. I njëjti libër, në gjuhën portugeze, me titull “Sentimento de luz” është botuar nga Shtëpia Botuese PROTEXTO, në Curitiba (kryeqytet i shtetit Paraná, në Brazil). Ndërkaq në vitin 2008, Shtëpia Botuese O LUTADOR në Belo Horizonte (kryeqytet i shtetit Minas Gerais, në Brazil), ka botuar librin e këtij autori “Madre Teresa – um amor sem limites” (Nënë Tereza – një dashuri e pakufijshme), me parathënien e Hirësisë së Tij – Kardinalit Serafim Fernandes Araújo dhe është pritur jashtëzakonisht mirë nga lexuesit dhe nga kritika. Që të dy librat, në gjuhën portugeze i janë përkthyer nga Profesoresha e mirënjohur Dr Vera Lúcia Alves Neves. Në vitin 2009 shkrimtari Baki Ymeri ia ka bërë një përzgjedhje poezishë, ia ka përkthyer rumanisht dhe ia ka botuar në Bukuresht, në shtator, librin poetik me titull “Să schimbăm lumea cu iubire” (Ta ndërrojmë botën me dashuri), për të cilin libër kanë shkruar kritikë letrarë të atjeshëm shumë pozitivisht. Shqip ka botuar librin “Ylli i Dardanisë rrezaton tokë e qiell” kushtuar Nënë Terezës, që këto ditë doli nga shtypi edhe në gjuhën italiane, dhe po përkthehet edhe në disa gjuhë botërore. Në Tiranë, shtëpia botuese Glolus R, ia ka botuar librin poetik “Trokitje të heshtura”, në gushtin e kaluar. Ka në dorëshkrimmedhe libra të tjerë, që besojmë së shpejti do e shohin dritën e botimit. Ai po punon edhe bër botimin e dy/tre librave të tjerë, në gjuhën amtare.
Në janar të vitit 2009 pati një aksident të tmerrshëm automobilistik në Slloveni dhe mbas mbi pesë javë në gjendje koma, falënderojmë Zotin që dëgjoi dhe përfilli lutjet e shumë dashamirësve, e ringjalli mrekullisht dhe po e merr vetin ngadalë, por sigurtë. Nga ky autor mund të presim edhe shumë tituj e shumë libra të tjerë, sepse nuk pranë kurrë së shkruari, me penën e tij mjaft të mprehtë e të ëmbël.